Прашањата до психолозите и психотерапевтите може да ги испраќате на е-пошта: prasajpsiholog@deca.mk. Ве молиме прашањата пишувајте ги на кирилица. Нашето мото е: Кој прашува, дејствува! Кој си молчи, претпоставува!

ПРАШАЊЕ: Имаме две деца, синот има 2 години и 8 месеци, а девојчето 1 година. Кога се роди второто дете, поголемото почна да покажува знаци на агресивно однесување. Некогаш тепа во градинка, некогаш и него го тепаат, но последното многу ме загрижи – учителката ми кажа дека ги давел дечињата. Му зборуваме многу, расте во хармонична средина, и во потесното и поширокото семејство, и не знам што го предизвикува таквото однесување. Навистина многу сум загрижена.

ОДГОВОР: Агресивното однесување е во природата на човекот и во раните години тоа е порив за опстанок и начин на покажување и изразување незадоволство.

Таквиот порив треба да се регулира и да се обезбеди простор за канализација. Не споделувате дали однесувањето е карактеристично и во домот и кон сестричката. Ова може да биде и начин на преместување на чувствата кои почувствувал дека се непожелни дома. Советувам да почнете да го работите прирачникот „Кога Ушко е лут“ и играта со карти за емоции „Кога сите сме заедно“. На тој начин ќе му ги доближите чувствата и ќе создадете простор за нивно вербализирање.

Колку порано стекне емоционални вештини, толку побрзо таквото однесување ќе исчезне.

Одговара: Христина Стефановска, психолог за деца и адолесценти, Здружение „Хармоничен свет“, е-пошта: hristina_psihologija@yahoo.com

Психолозите и психотерапевтите ги одговараат прашањата според редоследот на нивното испраќање, а одговорите ќе се објавуваат на Деца.мк. Одговорите имаат психоедукативна функција и ги насочуваат родителите кон посеопфатни насоки на решавање на состојбата што ги мачи. Се разбира, покомплексните прашања подразбираат покомплексен пристап.

Рубриката „Прашај психолог“ овозможува стручна поддршка од психолози и психотерапевти на родителите при справување и решавање одредени актуелни прашања од психолошка природа на нивните деца и е резултат на соработка помеѓу Деца.мк и „Психотерапика“ – здружение за психологија и психотерапија. На прашањата одговараат психолози и психотерапевти, членови и соработници на здружението, како и самостојни експерти, соработници на Деца.мк.