Новороденчињата и доенчињата може да имаат различни дамки на нивните тела. Во зависност од нивната големина, форма, боја и местоположба, некои од овие нормални состојби на кожата можат да бидат шокантни, застрашувачки и вознемирувачки. А една таква е хемангиом на јагода.
Што е тоа и дали е опасно? Еве што треба да знаете.
За што станува збор?
Хемангиом на јагода се нарекува уште и инфантилен хемангиом, трага од јагода или невус на јагода. Станува збор за белег од раѓање или неканцерозен тумор кој обично не е опасен или загрижувачки. Предизвикан е од еден куп мали крвни садови (капилари) што се собираат заедно во горниот слој на кожата додека бебето се развива во матката. Потоа, откако ќе се роди бебето, грутката расте.
Инфантилните хемангиоми се црвени или розови дамки на кожата на бебето кои можат да бидат рамни или подигнати. Тие се нарекуваат хемангиоми на јаготка затоа што понекогаш изгледаат како јаготка. Овие израстоци можат да бидат мали или прилично големи. Тие обично се појавуваат на главата и на вратот, но исто така можат да се најдат на телото и екстремитетите или на кое било друго место на телото на бебето.
Кога се појавува и кога исчезнува?
Вашето бебе може да се роди со хемангиом на јагода, но поверојатно е тој да се појави во првите неколку недели по раѓањето. Најчесто се појавува во првиот месец како ситен белег што изгледа како мала модринка или бледо место на кожата. Во текот на првите три до шест месеци инфантилниот хемангиом може да порасне многу брзо, станувајќи поцрвен како што расте.
Растот обично се забавува по шест месеци, но може да продолжи сѐ додека бебето не наполни девет до дванаесет месеци. Потоа, помеѓу една година и 18 месеци, хемангиомот може да почне да се израмнува, да се намалува и да избледува. Иако може да трае подолго, обично исчезнува кога детето ќе наполни пет години, а целосно исчезнува до неговата десетта година.
Причини
Инфантилните хемангиоми се многу чести. Студиите покажуваат дека тие се јавуваат кај 4 до 5 отсто од бебињата или кај едно од 20. Експертите не знаат зошто некои бебиња добиваат инфантилен хемангиом, но истражувачите откриле дека хемангиомите почесто се појавуваат кај:
Бели деца
Девојчиња
Бебиња со ниска родилна тежина
Предвреме родени бебиња
Првородени деца
Близнаци
Бебиња што се карлично поставени
Исто така, поверојатно е да се појават во вакви ситуации:
Повозрасна мајка
Прееклампсија
Плацента превија
Употреба на лекови за плодност
Семејна историја
Истражувачите истражуваат што го предизвикува хемангиомот. Во моментов не постојат докази дека е предизвикан од некаква храна, активност или изложеност на животната средина за време на бременоста.
Дијагноза
Лекарот може да забележи хемангиом при една од посетите, додека го прегледува вашето бебе. Ако видите нешто, задолжително укажете му на лекарот за да може да го следи додека расте, а потоа избледува. Педијатарот често може да го следи хемангиомот, но исто така може да посетите и детски дерматолог.
Лекарот може да ви постави дијагноза само со преглед на бебето и на самото место. Сепак, тој може да нарача и други тестови, како што се ултразвук или МРИ.
Загриженост
Хемангиомот на јагода може да се појави и да расте како тумор, но тоа не е рак и нема да се шири како рак. Иако обично нема потреба да се грижите и компликациите се ретки, постојат неколку работи кои треба да ги следите. Известете го докторот ако:
Расте многу брзо;
Му пречи во дишењето на вашето бебе;
Се наоѓа на окото на бебето и го блокира неговиот вид;
Редовно крвави;
ако е инфицирано;
Постојат многу хемангиоми на телото на бебето.
Третман
Ако хемангиомот е само козметички, а не медицински проблем, треба да го оставите природно да исчезне. Сепак, вашиот лекар ќе разговара со вас за третман базиран на тоа:
– Каде се наоѓа на телото на вашето бебе;
– Колку брзо расте;
– Колку е голем;
– Колкава е веројатноста да се предизвикаат компликации;
– Дали има повеќе хемангиоми;
– Колкаво е вашето бебе;
Се разбира, може да немате избор за третманот и можеби тој го попречува здравјето или развојот на вашето бебе, а неговата големина и локација предизвикува проблем со дишењето, видот, јадењето и зборувањето.
Третманот обично вклучува набљудување, компресија, орални лекови како што се пропранолол или кортикостероиди, инјекции со стероиден лек, криотерапија со течен азот, ласерски третмани и операција.
Ако се остави хемангиомот да исчезне сам, тој обично исчезнува без да остави лузна. Сепак, некои не исчезнуваат целосно, а други можат да ја остават кожата без боја и со лузна. На некои остатоци од трагите може да се потребни дополнителни третмани или операција.
Компликации
Општо земено, хемангиомите на јагода не се причина за загриженост. Меѓутоа, ако забележите некој израсток на вашето бебе, секогаш е паметно да го провери лекар. Компликациите се многу ретки, но може да се случат. Проблемите што можат да се развијат од хемангиом на јагода се:
Крвавење: Понекогаш, хемангиомот на јагода ќе се удри, изгреба или ќе се повреди, предизвикувајќи крвавење.
Отворена рана: Отворената рана се нарекува чир. Чирот може да се формира од триење или повреда. Чиревите можат да предизвикаат други компликации, како што се болка, крвавење, инфекција и лузни.
Инфекција: Бактериите можат да навлезат во телото од отворот на кожата.
Болка: Хемангиомите обично не се болни за детето. Но, можат да станат болни ако пораснат големи и ако пречат во работата на одредени органи.
Лузни: Хемангиомите можат да остават лузна. Постои поголема веројатност за појавува на лузна ако имало чир, повреда, крвавење или инфекција. Понекогаш и третманот може да предизвика лузни.
Автор: Дона Муреј
912