Ако штотуку сте откриле дека сте бремени, веројатно ќе ги поминете следните месеци прашувајќи се како вашето бебе расте и се развива. Можеби имате многу прашања за развојот на фетусот и можеби се прашувате: „Кога се развива мозокот кај фетусот?“

За среќа, развојот на феталниот мозок обично следи прилично предвидлив распоред. Всушност, феталниот нервен систем, или мозокот и ‘рбетниот мозок на вашето бебе, е еден од првите системи што се развиваат.

Како се развива мозокот на вашето бебе по тримесечје

Откако ќе дознаете дека сте бремени, мозокот на вашето бебе веќе работи. Всушност, само четири недели по зачнувањето основата на мозокот и ‘рбетниот мозок на вашето бебе веќе се формираат.

Прво тримесечје

Во текот на првите месеци од бременоста се обликуваат мозокот и лицето на вашето бебе. Сепак, иако вашето бебе развива специфични делови од мозокот, првата електрична активност на мозокот почнува да се јавува дури околу шестата недела. До десеттата недела од бременоста главата на вашето бебе станува позаоблена, а во единаесеттата недела главата на вашето бебе сè уште сочинува околу половина од нејзината должина.

Второ тримесечје

Во овој период мозокот на вашето бебе ги насочува дијафрагмата и мускулите на градниот кош да се контрахираат, што е многу слично како вежби за дишење. Во тоа време вашето бебе ги учи своите први импулси за цицање и голтање. Всушност, до 21. недела природните рефлекси на голтање на вашето бебе овозможуваат да се голтаат мали количини плодова вода секој ден.

До крајот на второто тримесечје мозочното стебло е речиси целосно развиено. Мозочното стебло на вашето бебе го контролира следново:

-Срцевиот ритам
-Дишењето
-Крвниот притисок.

Уште повеќе, феталниот нервен систем е доволно развиен што вашето бебе ќе се изненади од гласните звуци надвор од матката. И до 28. недела активноста на феталните мозочни бранови се карактеризира со циклуси на спиење, вклучувајќи го и РЕМ-спиењето, каде што обично се случува сонување.

Трето тримесечје

Во текот на третото тримесечје мозокот на вашето бебе речиси тројно се зголемува. Поранешната мазна површина на мозокот на вашето бебе станува сè поизбраздена, почнувајќи да личи на сликите на мозоците што сте навикнати да ги гледате. До моментот кога ќе се роди вашето бебе, мозокот во голема мера наликува на мозокот на возрасен – но важно е да се запамети дека неговиот развој е далеку од завршен. Мозокот постојано ќе созрева како одговор на околината на вашето бебе.

Делови од мозокот на бебето

Човечкиот мозок има пет различни региони кои се развиваат за време на бременоста и секој дел од мозокот има уникатна функција.

Церебрам: Овој дел од растечкиот мозок на вашето бебе е одговорен за сето расудување, размислување, меморирање и чувства што ќе ги доживее. Тоа е најголемиот дел од мозокот и е местото каде што се наоѓаат фронталниот и темпоралниот лобус.

Малиот мозок: Овој дел го приспособува движењето и помага при контрола на моториката, а може да биде потребно време да се развие кај новороденчињата.

Мозочно стебло: Пулсот, крвниот притисок и дишењето на вашето бебе се контролирани од мозочното стебло.

Хипофиза: Ова е познато како центар на хормони. Хипофизата е одговорна за растот на сите нешта и игра улога и во метаболизмот.

Хипоталамус: Овој дел ја контролира телесната температура на вашето бебе, жедта, гладот, емоциите и спиењето.

Фактори што влијаат врз развојот на феталниот мозок

Многу фактори можат да влијаат врз развојот на феталниот мозок, но повеќето здрави луѓе не треба радикално да го менуваат својот живот за да промовираат здрав раст. Всушност, најважниот фактор за оптимален раст на мозокот е да се живее здрав начин на живот, кој вклучува јадење здрава исхрана и вежбање.

Важно е бремените жени да ги елиминираат алкохолот и цигарите. Овие супстанции можат да го нарушат формирањето и поврзувањето на мозочните клетки.

Инфекции

Генерално, инфекциите претставуваат најголем ризик за бебето кое расте и се развива. Повеќето родители се имуни на најопасните од нив, на пример, сипаниците. Сепак, токсоплазмозата, некои сексуално преносливи болести и цитомегаловирусот се загрижувачки и треба да се разговара со лекар.

Стрес

Некои истражувачи веруваат дека стресот во текот на бременоста може да влијае врз растот и развојот на мозокот. Всушност, една студија покажала дека стресот на една личност за време на бременоста ја менува нервната поврзаност во мозокот на фетусот.

Холин

Во меѓувреме, друга студија покажала дека консумирањето холин, суштинска хранлива материја што се наоѓа во јајцата, говедското месо и црниот дроб, може да помогне да се спречат проблеми со развојот на мозокот на бебето. Холинот дури помогнал и кога трудниците се соочувале со болест како што е грипот. Всушност, студијата покажала дека додатоците на холин можат да спречат развојни проблеми кај неродените бебиња кога гестацискиот родител има инфекција или настинка.

Интересно е тоа што пренаталните витамини обично не содржат холин. Како резултат на тоа, истражувачите заклучиле дека суплементите можат да им помогнат на бремените луѓе да достигнат високи нивоа на холин, што им се потребни на нивните бебиња. Како и со секој додаток, сепак, разговарајте со вашиот лекар пред да го земете.

Автор: Шери Гордон

Извор