Статијата е напишана од психолози експерти од областа на семејната психологија, собрани во платформата „Псидацта“ за следење и поттикнување на детскиот развој.

Родителството е прекрасно, но истовремено исполнето со предизвици. Кога сме под стрес или сме преплавени од силни емоции, како лутина или фрустрација, нашите реакции имаат значително влијание врз децата. Тие учат од нашето однесување, а нашиот пристап во тешки моменти игра клучна улога во нивниот емоционален развој.

Според истражување објавено во „Журнал оф чајлд енд фемили стадис“, родителите што успешно ги регулираат своите емоции не само што создаваат поблиски односи со своите деца, туку им помагаат и во развојот на самоконтролата и емоционалната стабилност. Од друга страна, импулсивните реакции, како викањето, можат да ги намалат довербата и чувството на сигурност кај децата.

Што претставува емоционалната саморегулација?

Емоционалната регулација подразбира препознавање на сопствените чувства, нивно разбирање и контролирање на однесувањето во моменти на стрес. Оваа способност овозможува промислено реагирање наместо импулсивно. Родителите што ја развиле оваа вештина покажуваат повеќе емпатија и трпение, што придонесува за посилни семејни врски.

Емоционалната регулација е вештина што се учи и постојано се усовршува. Еве три практични совети за нејзино развивање:

Вежбајте свесност

Свесноста подразбира присутност во моментот без осудување на сопствените чувства. Кога ќе почувствувате лутина или фрустрација, застанете и дишете длабоко. Прашајте се: „Што точно чувствувам? Како можам да реагирам на начин што ќе биде корисен за мене и моето дете?“

Овој пристап го намалува импулсивното однесување и ви помага да донесувате смирени одлуки.

Бидете благи кон себе

Родителите често се стремат кон совршенство, што води кон чувство на вина кога ќе згрешат. Наместо да се критикувате себеси, потсетете се дека грешките се дел од животот. Секој момент е шанса за учење. На пример, речете си: „Денес не беше совршен ден, но утре е нова можност.“

Децата, гледајќи го вашиот љубезен однос кон себе, ќе научат како да се справуваат со сопствените емоции и грешки.

Користете техники за смирување

Едноставните техники за релаксација, како длабокото дишење, можат да го намалат стресот и да ви помогнат да се фокусирате. Пробајте ја техниката „4-7-8“:

Вдишете полека низ нос броејќи до 4.
Задржете го здивот додека броите до 7.
Издишете низ уста броејќи до 8.
Повторете го циклусот неколку пати.
Оваа метода го смирува нервниот систем и создава чувство на баланс.

Заклучок

Родителството е едно од најубавите, но и најпредизвикувачки искуства и претставува комбинација од љубов и трпение. Со свесност, разбирање и алатки за смирување, можете не само да ги контролирате сопствените емоции, туку и да градите поблиски односи со вашите деца. Врската полна со љубов и разбирање е темел на здрав и среќен семеен живот.

Извор