Експертите ја дефинираат емоционалната интелигенција како способност за препознавање, разбирање, изразување и управување со сопствените емоции. Имајќи предвид дека тоа тешко може да го постигнат и возрасните, многу родители се изненадени кога ќе сфатат дека нивните деца се многу способни да развијат емоционална интелигенција – и тоа уште од мали нозе.

Како што објаснува клиничкиот психолог Лиза Фајрстоун, постојат одредени знаци кои јасно укажуваат дека детето е емоционално интелигентно. Според неа, постојат неколку работи кои ги прават речиси сите деца со развиена емоционална интелигенција. Една од тие работи е плачењето. Иако звучи необично, детето кое се чувствува безбедно плачејќи пред родители или други луѓе, всушност, не се плаши да ги изрази своите емоции, што е еден од главните знаци на емоционалната интелигенција.

Исто така, детето кое е емоционално интелигентно има развиено емпатија, односно способност да сочувствува со другите или да ги препознае нивните чувства. Ако детето е особено чувствително, може да покаже тага ако види дека другарчето во градинка или училиште е тажно, а често знае и да ги утеши своите врсници кога се чувствуваат лошо, објаснува психологот.

Друг симптом кој често е знак за емоционална интелигенција кај децата е поврзан со нивната отворена врска со нивните родители. Имено, детето кое секогаш зборува за своите проблеми, емоции и работи што го мачат има развиена емоционална интелигенција, а истовремено е поспособно да се справи со предизвиците што ги носи растењето.

Фајрстоун наведува и дека детето со емоционална интелигенција често покажува високо ниво на љубопитност. Иако секое дете е љубопитно до одреден степен, детето со развиена емоционална интелигенција е отворено и заинтересирано за работите што се случуваат околу него. Исто така, овие деца имаат силна желба за учење, па обично се многу успешни на училиште или имаат многу хобија.

Извор