Проблемите со тироидната жлезда често се поврзуваат со возрасните, а многу родители се изненадени кога дознаваат дека проблемите со тироидната жлезда се најчестото ендокринолошко нарушување кај децата на училишна возраст. Се проценува дека речиси 37 од 1.000 деца имаат некоја форма на болест на тироидната жлезда.

Имено, на секоја клетка во телото ѝ се потребни тироидни хормони за да функционира на нормално ниво, така што проблемите со тироидната жлезда кај децата можат да влијаат на многу различни начини, во зависност од видот на нарушување на тироидната жлезда што го има детето. Тироидните хормони играат особено важна улога во поддршката и регулирањето на растот, како и многу други телесни функции.

Кои се вообичаените проблеми со тироидната жлезда кај децата?

Двата најчести проблеми со тироидната жлезда кај децата се хипотироидизам и хипертироидизам. Други, поретки проблеми со тироидната жлезда кај децата, исто така, вклучуваат рак на тироидната жлезда и тироидни јазли.

Хипотироидизам се јавува кога тироидната жлезда не испраќа доволно хормони до телото. Имено, тироидните хормони регулираат многу телесни функции, вклучувајќи го и телесниот метаболизам. Кога нема доволно хормони, системите на телото може да почнат да се забавуваат. Вообичаени симптоми на хипотироидизам кај децата се:

-запек
-сува кожа
-замор
-чувство на студ
-губење на косата
-неправилни менструации (кај девојчињата)
-слаба меморија или проблеми со концентрацијата
-бавен раст.

Хипотироидизмот може да биде вроден, што значи дека со него се раѓаат бебињата, или може да се стекне и да се развие во доцното детство или тинејџерските години. Една од најчестите причини за ниско лачење на тироидната жлезда е тироидитис (болест Хашимото), автоимуна болест именувана по докторот кој ја открил состојбата. Болеста ја напаѓа тироидната жлезда и ја оштетува. Хашимото е многу честа кај девојчињата, додека многу поретко се јавува кај момчињата.

Од друга страна, хипертироидизам се јавува кога тироидната жлезда е прекумерно активна и испраќа премногу тироидни хормони во телото. Тоа може да предизвика „забрзување“ на телото, што значи зголемување на метаболизмот во организмот. Вообичаени симптоми на хипертироидизам кај децата се:

-дијареја
-тешкотии со концентрацијата
-чувство на топлина
-забрзан раст
-огромен апетит
-неправилни менструални циклуси (кај девојчињата)
-раздразливост
-мускулна слабост
-тремор (обично во рацете).

Најчеста причина за хипертироидизам е Гравесовата болест, автоимуна болест која предизвикува формирање на антитела кои му кажуваат на телото да произведува повеќе тироидни хормони отколку што му е потребно. Други причини за хипертироидизам, исто така, вклучуваат воспаление и нодули во тироидната жлезда.

Извор