Три дена по мојот царски рез умот ми работеше сто на час. Беше време јас и мојот сопруг да си одиме дома заедно со нашето бебе и да почнеме живот како ново тричлено семејство. Но, колку и да ми недостигаше сопствениот кревет и сакав да се истуширам – бев преплашена мајка и не брзав да ја напуштам зградата полна со обучени професионалци.

Сериозно. Излегувањето беше до 18 часот и јас не заминав од собата ни секунда порано.

Периодот на закрепнување по породувањето во САД е прилично тежок. А јас сум една од тие што имаа среќа. Многу жени се вознемируваат кога некој ќе им го спомене овој период. Како една од развиените земји, вообичаено е американските жени да се вратат на работа неколку дена по породувањето.

Постпородилните традиции низ светот драстично варираат во зависност од тоа каде се наоѓате. Некои традиции може да изгледаат архаични и репресивни, но во повеќето земји фокусот на закрепнување е на мајката, како и поврзувањето на мајката и бебето, а вклученоста на заедницата се чини дека е норма.

Во Кина мајките имаат едномесечен период на одмор познат како „узо јуези“. Во текот на овој месец жените се ограничени во тоа што можат да јадат, пијат и што можат да прават. Тие јадат супа наменета за поттикнување на лактацијата и не им е дозволено да се капат во текот на овој месец. Сето ова, заедно со пижамите, топлите чорапи и одморот треба да помогне во обновувањето на јингот и јангот на мајката и зајакнување на новороденчето. И додека обично жените го поминуваат месецот со семејството, станува тренд да се престојува во луксузен објект со цена од околу 500 долари на ден.

Во Франција мајките остануваат на болница цели пет дена. Откако ќе си одат дома, медицинските сестри прават рутински домашни повици за да им посочат лекови и им земаат крв за кое било неопходно тестирање. Жените, исто така, добиваат рецепти за физикална терапија што им помага за мускулите на карлицата. Французинките навистина уживаат во сето тоа – сирење, кроасани, вино и, секако, универзална здравствена заштита.

Индија има долга традиција на „постпородилно ограничување“. Фразата звучи ужасно, но 40 до 60 дена мајката и бебето се затворени дома за да спречат изложеност на заразни заболувања. Во овој период мајката се храни со здрава и лесно сварлива храна што треба да го одржува телото топло. Сапунот не се користи во текот на капењето и наместо тоа се даваат билки. На мајките им се дава дневна масажа со специјални мешавини од масло што помагаат во закрепнувањето и зајакнувањето на телото.

Нигерија има симболична традиција на капење што можеби се чини насочена кон бебето, но всушност е за мајката. Бабата традиционално прва го бања бебето. Ова е за да се покаже дека мајката не е сама и дека има цела заедница од жени подготвени да ја поддржат.

Во Германија на трудницата ѝ се дава брошура за пренатална помош. Оваа брошура се нарекува „мутерпас“ и жената доаѓа со неа во текот на сите пренатални  и постнатални посети на лекар. Намерата е да се обезбеди дека лекарите се свесни за какви било потенцијални здравствени ризици, како и дека ја следат нејзината здравствена состојба во текот на целиот период.

Во многу земји во Латинска Америка се набљудува „ла куарентена“. Ова е период кога мајката и бебето се затворени дома 6 недели. Новите мајки се воздржуваат од секс, избегнуваат одредена храна и немаат никаква напорна активност. Поентата е во текот на овој период мајката да има време и енергија да се посвети на доењето и да се грижи за бебето. Во текот на овие шест недели другите членови од семејството треба да помогнат во грижата за другите деца, да приготвуваат оброци и да помогнат во активностите околу домаќинството.

Финска има една постпородилна традиција за која веројатно се зборува многу во последните години. Секое новороденче во Финска си оди дома со бебешка кутија. Кутијата има мал душек и може да се користи како кревет за бебето. Покрај душекот, кутијата е полна со неопходни работи како облека, зимска опрема за бебето со капа и ракавици, пелени, албум за слики, играчки што помагаат во текот на растењето на забите и препарати за хигиена за бебето.

Државите како Њу Џерси и Алабама ја усвоија традицијата на бебешки кутии бидејќи практиката е многу ефикасна во намалувањето на стапката на смртност кај новороденчињата.

САД треба многу да научат од земјите во светот. Не дека се залагам за карантин, но нивото на поддршка и грижа, како и лесно достапни ресурси, не се доволни во текот на постпородилниот период.

Автор: Сара Фарел Бејкер
Извор