Причина е и тоа што климата во која растат е слична – општо непочитување на јазикот – вели наставничка по македонски јазик

Неправилна употреба на мала и на голема буква, пропуштање букви во големи зборови, употреба на зборови на дијалект, слеани зборови, мешање на „ч“ и „ќ“, на интерпункциските знаци, се едни од најчестите грешки што основците ги прават во диктатите и писмените задачи. Наставници велат дека загрижува нивото на писменост и во одделенска и во предметна настава.
Со диктатите се утврдува само основната јазична писменост на учениците – познавање на буквите, составување зборови и реченици, правопис и употреба на интерпункциски знаци. Но, наставници велат дека учениците имаат проблем и да ја разберат реченицата, да прераскажуваат приказни…

Доаѓаат сѐ полоши генерации

– Диктати им давам во второ одделение, откако ќе ги научат буквите, а во трето откако ќе ја поминеме и латиницата. Децата најмногу грешат при користење на интерпункциските знаци бидејќи не го следат говорот на наставникот. Не се учени да слушаат изразно читање со почитување на овие знаци – вели Татјана Николова, одделенска наставничка.

Нагласува дека учениците се многу полоши во однос на граматиката, но и изразувањето, прераскажувањето, за разлика од претходните генерации.
– Имам сѐ послаби ученици. Тоа е резултат и на негрижата на родителите. Не им читаат, не им раскажуваат приказни, не го будат љубопитството од најмали нозе. Еден куриозитет што сум го забележала е дека мешаат дијалект во зависност од потеклото на нивната мајка. Па тоа се гледа и во писмените работи, диктатите, тестовите – вели таа.

Општо непочитување на јазикот

Голем дел од учениците грешат и кај употребата на мала и на голема буква, вели оваа наставничка.
– Мора да кажам и дека материјалот им е преобемен во второ одделение, учат ем букви ем граматика и премногу им е да запаметат сѐ. Кој се труди малку повеќе, веќе во четврто одделение се подобрува – раскажува Николова.
Наставничка по македонски јазик од скопско основно училиште вели дека нивото на владеење на македонскиот јазик и кај учениците од 6. до 9. одделение не е многу поинакво од општата состојба со јазикот во Македонија.

– Поразителен е односот на учениците кон македонскиот јазик. Не сметаат дека им е важен за иднината. Ова веројатно е така зашто и климата во која растат е слична – општо непочитување на јазикот – вели таа.
Таа забележала дека нејзините ученици најмногу грешат во акцентирањето.
– Сиромашен им е речникот, редовно почнуваат реченица со „е па“, „дека“, неправилни конструкции – вели таа.

Наставниците велат дека учениците сѐ помалку читаат книги, не ги купуваат и не разговараат меѓу себе за книгите. Николова вели дека поради тоа што учениците често ги користат компјутерите и паметните телефони, кирилицата ја мешаат со латиницата.