Прашањата до психолозите и психотерапевтите може да ги испраќате на е-пошта: prasajpsiholog@deca.mk. Ве молиме прашањата пишувајте ги на кирилица. Нашето мото е: Кој прашува, дејствува! Кој си молчи, претпоставува!

ПРАШАЊЕ: Моето дете има седум години, но порасна само дома, без другарчиња бидејќи во нашето место немаше многу деца. Затоа сега ѝ е тешко да се вклопи со друштво, не знае како да се однесува, се срами, скржава е и прави како што ќе ѝ речат. Се плаши и тие што играат со неа да не почнат ја избегнуваат. Грешката е кај нас, требаше порано да ја вклопиме во друштво. Како детето да се опушти со други деца?

ОДГОВОР: Сите ние имаме потреба да се чувствуваме посакувани, почитувани и прифатени… Социјалните разочарувања можат да направат да се чувствуваме изолирани, беспомошни, тажни, лути или отфрлени. Вашето девојче е чувствително и има посмирен темперамент. Децата што немаат многу можности за дружење често се чувствуваат осамени и имаат ниска самодоверба. Тие, исто така, може да имаат тешкотии да ги регулираат своите емоции и соодветно да ги изразат своите чувства.

Недостигот на социјални вештини кај децата рефлектира неможност да се препознаат сигналите на другите деца кога тие сакаат да споделат нешто или да ги изразат своите емоции. Малку не ми е јасно вашето прашање бидејќи во вашето место немало деца, а сега има и таа не знае и не умее како со нив. За да се потикне детето во социјализацијата, вие треба да ѝ помогнете. Охрабрете го вашето дете да комуницира и да ги изразува своите идеи и чувства. Разговарајте за емоциите и потврдете ги. Важно е да ѝ објасните дека тоа што ѝ се случува не е нешто чудно и наведете ситуација во која сте се чувствувале на ист начин, како сте се поврзувале со ваши другари кога вие сте биле мали.

Научете ја на основните социјални вештини, како што се поздравување, споделување, слушање и почитување на другите. Можете да го направите тоа преку играње улоги или со читање книги на тема емпатија и пријателство, а дома да практикувате и да ја вклучувате во вашите секојдневни семејни активности. Поканете ги другите деца во вашата куќа да играат или да прават активности заедно. Поттикнувајте ја на посуптилен начин за не се почувствува „исплашена“ или „засрамена“ и малку по малку ќе ја соочувате со децата, а понатаму тие сами ќе го најдат својот заеднички јазик низ играта. Кога ќе забележите некоја иницијатива од нејзина страна, пофалете ја и охрабрете ја, кога дели, кога се приближува, кога започнува игр итн.
Секој родителот сака неговото дете да биде самоуверено и смирено во социјалните ситуации, но важно е да разберете дека тоа не им доаѓа природно на сите деца. Тоа не значи дека никогаш нема да се отвори, туку само дека ѝ треба простор и време за да се навикне на другиот, т.е. на другите деца.

Доколку ви е потребна дополнителна помош и разговор за развојот на вашето дете, можете да закажете родителско советување и психоедукација на sovetuvanje@gmail.com

Одговара: Билјана Манасова-Јовановиќ, дефектолог и психотерапевт; Психотерапија и советување 
е-пошта: sovetuvanje@gmail.com

Психолозите и психотерапевтите ги одговараат прашањата според редоследот на нивното испраќање, а одговорите ќе се објавуваат на Деца.мк. Одговорите имаат психоедукативна функција и ги насочуваат родителите кон посеопфатни насоки на решавање на состојбата што ги мачи. Се разбира, покомплексните прашања подразбираат покомплексен пристап.

Рубриката „Прашај психолог“ овозможува стручна поддршка од психолози и психотерапевти на родителите при справување и решавање одредени актуелни прашања од психолошка природа на нивните деца. На прашањата одговараат психолози и психотерапевти соработници на Деца.мк.