Прашањата до психолозите и психотерапевтите може да ги испраќате на е-пошта: prasajpsiholog@deca.mk. Ве молиме прашањата пишувајте ги на кирилица. Нашето мото е: Кој прашува, дејствува! Кој си молчи, претпоставува!

ПРАШАЊЕ: Имам дете кое сега навршува 2 години. Сѐ досега имаше уреден психофизички развој, развиен говор со сврзување реченици и солиден фонд на зборови. Од пред 3 недели прво почна да пелтечи, а потоа и неправилно да зема воздух пред да го каже зборот, но забележувам и дека многу помалку зборува за разлика од претходно. Неколку дена пред првпат да забележам дека пелтечи, се уплашил од петарда што пукнала надвор. Дали е можно ова однесување да е од претрпен страв и стрес?

ОДГОВОР: Разбирам дека сте загрижени и исплашени, особено затоа што го поврзувате пелтечењето со стравот од она што се случило. Но, во периодот помеѓу втората и петтата година, кога говорот интензивно се развива, многу деца поминуваат низ т.н. физиолошка фаза на пелтечење. Поврзана е со незрелоста на говорниот апарат, кој не е во состојба да го следи интензивниот развој на мислата и богатството на вокабуларот.

Се изразува преку повторување звуци или слогови, продолжување на звуците, прекинување, повторувајќи некој збор неколку пати итн.

Веројатно се појавува кога вашето дете е уморно, возбудено, ако зборува за нови и сложени теми, ако поставува прашања или одговара на оние што му се поставени или ако разговара со некој што го слуша.

Секако дека може да се јави и како одговор на некоја стресна ситуација. Во овој момент вашето дете не е свесно дека не зборува правилно, но грижата на вашето лице ќе му каже дека нешто не е во ред и тоа може да предизвика поголем проблем.

Поради тоа, бидете смирени кога ви се обраќа, слушајте што има да каже со трпение и насмевка на вашето лице, дајте му време додека да се искаже, не покажувајте никаква вознемиреност поради неговите проблеми со флуентноста, давајте му голема емоционална поддршка и пофалувајте го во работите во кои е успешно. Фокусирајте се на вниманието и на содржината, а не на тоа како детето зборува, предвидете што сака од вас додека се труди нешто да ви каже.

Бидејќи вашето дете е на возраст кога почнува да го истражува и осознава светот, би било добро да внимавате на кој начин реагирате на различни стимули од надворешната средина, бидејќи вашето дете ќе учи од вас. Значи, доколку се уплаши од нешто, вие не треба да кревате голема паника или премногу да го штитите бидејќи тоа сфати вака: „Ако мама толку многу ме штити, тоа навистина е многу страшно“ или „Ако мама се плаши повеќе од мене, тогаш тоа е страшно“.

Ако ваквото „пелтечење“ продолжи и во наредните 6 месеци, би било добро да посетите логопед.

Доколку ви е потребна дополнителна помош за развојот на вашето дете, можете да закажете родителско советување и психоедукација на sovetuvanje@gmail.com

Одговара: Билјана Манасова-Јовановиќ, дефектолог и психотерапевт; Психотерапија и советување 
е-пошта: sovetuvanje@gmail.com

Психолозите и психотерапевтите ги одговараат прашањата според редоследот на нивното испраќање, а одговорите ќе се објавуваат на Деца.мк. Одговорите имаат психоедукативна функција и ги насочуваат родителите кон посеопфатни насоки на решавање на состојбата што ги мачи. Се разбира, покомплексните прашања подразбираат покомплексен пристап.

Рубриката „Прашај психолог“ овозможува стручна поддршка од психолози и психотерапевти на родителите при справување и решавање одредени актуелни прашања од психолошка природа на нивните деца. На прашањата одговараат психолози и психотерапевти соработници на Деца.мк.