Замислете вашето дете да го изеде омилениот сладолед или да испие освежувачки пијалак, а потоа одеднаш да почувствува вртоглавица, слабост или дури да ја загуби свеста. Иако ова звучи драматично, британските експерти предупредуваат дека една често користена состојка во храната може да биде причина за ваквите реакции.

Станува збор за глицеролот, супстанција која се додава во разни прехранбени производи за да ја задржи нивната влажност, да спречи сушење или да ја подобри текстурата. Може да се најде во тортилји, зачини, преливи за салати, гуми за џвакање, протеински плочки и многу други намирници што секојдневно ги консумираме.

Иако возрасните лесно го разградуваат глицеролот, кај децата ситуацијата е поинаква. Нивното тело е помало и побавно ја обработува оваа супстанција, што може да доведе до труење со глицерол, предизвикувајќи нагло намалување на нивото на шеќер и калиум во крвта, па дури и несвестица.

Зошто глицеролот е проблематичен за децата?

Истражувањата покажале дека 21 дете развиле симптоми како вртоглавица, поспаност, потење и несвестица во рок од еден час по пиење разладени пијалаци. Главната причина? Низок шеќер во крвта (хипогликемија) и недостиг на калиум, што може да доведе до сериозни последици како тресење, напади, па дури и кома.

Во најтешките случаи реакцијата на глицеролот може да предизвика шок, состојба во која циркулацијата на крвта значително се влошува, а виталните органи не добиваат доволно кислород. Симптомите се: бледа, студена, испотена кожа, забрзано дишење, слабост, гадење и жед.

Во кои намирници се наоѓа глицеролот?

Глицеролот не е секогаш јасно означен на декларациите бидејќи може да се крие под различни имиња, како глицерин, глицил алкохол, трихидроксипропан или 1,2,3-пропанетриол.

Најчесто може да се најде во следниве производи:

Разладени пијалаци – Најголем број случаи на несвестица кај децата биле поврзани со овие ледени пијалаци;
Тортилји – Особено оние од пченично и пченкарно брашно, каде што глицеролот ја одржува мекоста и ја спречува сувоста;
Гуми за џвакање – Глицеролот ја дава потребната еластичност и свежина;
Сладолед и глазури за колачи – Го спречува создавањето на ледени кристали и ја одржува текстурата на глазурите;
Житни и гранола плочки – Често се користи како конзерванс за одржување на свежината;
Преливи, сосови и зачини – Се додава за да ја подобри текстурата и да спречи сушење;
Конзервирана храна – во одредени супи и други преработени производи, глицеролот влијае врз влажноста, вкусот и изгледот.

Иако глицеролот не е штетен за повеќето луѓе, родителите треба да бидат свесни за можните негативни реакции кај децата, особено при внесување поголеми количини. Ако забележите вртоглавица, прекумерна жед, потење или слабост, најдобро е веднаш да побарате лекарска помош.

Следниот пат кога ќе купувате грицки или освежителни пијалаци за вашето дете, обрнете внимание на составот – ќе се изненадите колку често се користи оваа состојка.

Извор