Прашањата до психолозите и психотерапевтите може да ги испраќате на е-пошта: prasajpsiholog@deca.mk. Ве молиме прашањата пишувајте ги на кирилица. Нашето мото е: Кој прашува, дејствува! Кој си молчи, претпоставува!

ПРАШАЊЕ: Имам близнаци кои веќе наполнија 3 години и се обидуваме да се откажат од пелените, но имаат страв и не знам како да најдеме метод што ќе биде успешен. Ве молам за совет!

ОДГОВОР: Децата на оваа возраст главно се психофизички спремни за регулирање на нивните биолошки потреби и вашата заложба е во право време. Тргнувањето на пелените и регулирањето на оваа потреба е директно поврзано со нервниот систем, што бара воведување на некаков тренинг како би се регулирало сето тоа. Во тој тренинг најнапред треба да го ослободите детето од самата пелена, која во моментот детето ја чувствува како дел од него.

Тоа значи дека пелените не треба да бидат достапни во домот, со што детето учи да размислува надвор од нив. Не случајно овој процес се нарекува тренинг, тоа е така бидејќи се совладува преку обиди и грешки. Кога детето не ја регулирало потребата според вашите налози, го оставате да ја почувствува непријатноста од сето тоа, што го учи дека не сака повторно да му се случи непријатност. Во таквата последица го вклучувате самото дете, на пример, да се вклучи во процесот на чистење, да ви носи што ви е потребно итн.

Доколу стравот е тој што го блокира процесот, тогаш раскажувајте приказни на таа тема кои ќе носат порака на безбедност. Гледајте видео за деца со цртан приказ што го објаснува самиот процес, што ќе им овозможи да имаат чувство на контрола во однос на она што би можело да се случи.

Одговара: Христина Стефановска, психолог за деца и адолесценти, Здружение „Психит“, е-пошта: hristina_psihologija@yahoo.com

Психолозите и психотерапевтите ги одговараат прашањата според редоследот на нивното испраќање, а одговорите ќе се објавуваат на Деца.мк. Одговорите имаат психоедукативна функција и ги насочуваат родителите кон посеопфатни насоки на решавање на состојбата што ги мачи. Се разбира, покомплексните прашања подразбираат покомплексен пристап.

Рубриката „Прашај психолог“ овозможува стручна поддршка од психолози и психотерапевти на родителите при справување и решавање одредени актуелни прашања од психолошка природа на нивните деца и е резултат на соработка помеѓу Деца.мк и „Психотерапика“ – здружение за психологија и психотерапија. На прашањата одговараат психолози и психотерапевти, членови и соработници на здружението, како и самостојни експерти, соработници на Деца.мк.