Хемороидите се отечени вени во анусот и ректумот кои предизвикуваат чешање, печење, болка или крвавење. Тие се поделени на внатрешни, надворешни и мешани хемороиди во однос на локацијата и големината. Тие се многу честа појава кај општата популација и една од најчестите причинители за крвава столица.
Во повеќето случаи хемороидите се третираат со конзервативни методи – менување на навиките во исхраната, антиинфламаторни супозитории, нехируршки пристап или, како последна алтернатива, операција кога претходните мерки не постигнуваат задоволителен исход.
Жените имаат поголеми предиспозиции за развој на хемороиди за време на бременоста или за време на вагиналното породување поради зголемен притисок во абдоминалната празнина и хормонални промени.
Се проценува дека 25-35 отсто од трудниците се погодени од непријатноста предизвикана од хемороиди.
Како настануваат хемороидите во бременоста?
Како што матката се зголемува за време на бременоста, таа врши зголемен притисок врз вените на анусот и ректумот и предизвикува нивно отекување, станувајќи т.н. проширени вени.
Појавата на хемороиди за време на бременоста е проследена и со други фактори:
- Запек или констипација;
- Неправилни движења на дебелото црево (пожелно е веднаш да одите во тоалет кога ќе почувствувате потреба, а не да одложувате);
- Недоволен внес на течности;
- Неправилна исхрана со малку влакна;
- Долготрајно седење.
Хемороиди по породување
Многу жени добиваат хемороиди по вагиналното породување поради напрегање и големо зголемување на притисокот во абдоминалната празнина што се јавува во тој момент. Сепак, ова е нормална појава и не треба да биде причина за загриженост бидејќи во повеќето случаи, по одредено време, хемороидите исчезнуваат без потреба од лекување.
Симптомите што се јавуваат се:
- Свежа црвена крв во столицата (понекогаш видливи капки по дефекацијата);
- Чешање во аналната област;
- Иритација;
- Чувство на нецелосно празнење;
- Болка.
Ако хемороидите не поминат подолго време или не се лекуваат, може да се развијат компликации како анемија или зголемен ризик од инфекција.
Дијагноза
Иако е можно да се постави дијагноза од самиот клинички преглед, се претпочита да се каже колку што е можно подетално кога се појавиле симптомите и потоа да се направи физички преглед. Лекарот треба да направи дигитален ректален преглед како прв чекор. Потоа може да ве упати кај гастроентеролог за аноскопија за да се утврдат големината, локацијата, степенот на воспаление и крвавењето на хемороидите.
Аноскопијата или колоноскопијата се најдобрите дијагностички методи кои можат да ги визуализираат можните промени во завршниот дел на дебелото црево.
Третман и превенција
Кога станува збор за хемороиди за време на бременоста, природниот третман и превенција го вклучуваат следново:
- Промена на животниот стил и навиките во исхраната;
- Ако имате работа со седење, станувајте и шетајте неколку пати на ден или земете перници кои би го намалиле притисокот врз ректумот додека седите;
- Воведување влакна во исхраната (зеленчук и цели зрна);
- Пијте доволно течности;
- Користете влажни марамчиња без алкохол ако обичната тоалетна хартија е премногу груба за вас.
Крем или супозитории за хемороиди?
Тие обезбедуваат краткорочно олеснување и може да се добијат во аптека, но прво консултирајте се со вашиот лекар за препораки во врска со бременоста и кои препарати би биле безбедни за употреба.
Во моментов нема доволно препарати кои се тестирани и се безбедни за употреба во бременоста, а лекувањето на хемороидите се препорачува со зголемување на внесот на храна богата со растителни влакна, течности и воспоставување правилен редослед за одење во тоалет.
Повеќето симптоми исчезнуваат по породувањето, но доколку траат подолго од еден месец и покрај конзервативната терапија, неопходно е да се прибегне кон дополнителни мерки, како што се склеротерапија, криотерапија или операција.
Автор: д-р Марија Дугоњиќ
912