Сите добро знаеме дека повеќето деца сакаат слатко, но нутриционистот Џес Хилард, која е специјализирана за исхрана на деца, предупредува дека постојат одредени знаци кои можат да укажуваат на тоа дека детето консумира премногу шеќер, што може негативно да влијае врз неговото здравје.

Зголемување на апетитот

Ако апетитот на вашето дете е зголемен и забележите дека речиси никогаш не е целосно сито, тоа може да биде знак дека треба да го намали внесот на шеќер. Како што објаснува нутриционистот, иако слатка ужина одвреме-навреме не штети, доколку детето претера, поверојатно е дека ќе има зголемено ниво на глад.

„Тоа е така затоа што телото брзо го вари и апсорбира шеќерот, предизвикувајќи зголемување на нивото на шеќер во крвта и создавање желба за повеќе. Шеќерот, исто така, го активира производството на хормони за глад и го прави спротивното од хормоните што го потиснуваат гладот, со што човекот има поголема веројатност да посегне по нешто слатко“.

Промена во расположението

Нутриционистот вели дека промените во расположението може да бидат уште еден показател дека детето консумира премногу шеќер.

„Често слушаме дека слатката храна ни го зголемува расположението. Меѓутоа, во реалноста, шеќерот често предизвикува промени или опаѓање на расположението. Тоа е така затоа што шеќерот предизвикува краток скок на нивото на шеќер во крвта, најверојатно проследено со моментален пад, а тоа може драматично да влијае врз нивоата на хормони кои го регулираат расположението и прават да се чувствуваме очајни или неинспирирани. Исто така, може да ги влоши симптомите на анксиозност бидејќи падот на шеќерот во крвта може да нѐ направи нервозни“, објаснува Хилард.

Ненадеен пад на енергијата

Друг вообичаен знак дека консумираме премногу шеќер е чувството дека имаме многу помалку енергија од вообичаено, објаснува нутриционистот. Иста е ситуацијата и кога се во прашање децата.

„Многу претходни студии покажаа дека шеќерот всушност предизвикува замор, како и пад на нивото на енергија. Бидејќи шеќерот прави да се чувствуваме уморни, може да ја намали мотивацијата за извршување на секојдневните задачи и да направи да се чувствуваме демотивирани и неисполнети“, додава Хилард.

Мозолчиња и други проблеми со кожата

Шеќерот може значително да влијае врз кожата, главно предизвикувајќи мозолчиња, па дури и болни акни.

„Гликозата, состојка која се наоѓа во многу омилени слатки закуски, игра важна улога во тоа како изгледа кожата. Всушност, јадењето храна богата со шеќер го зголемува нивото на инсулин во телото, што може да предизвика зголемено производство на масло. Тоа масло може да ги затвори порите и фоликулите и да предизвика мозолчиња или воспаленија“, објаснува нутриционистот.

Извор