Сосема честа појава која загрижува многу жени е опаѓањето на косата по бременоста. За да знаеме што да очекуваме, како да се однесуваме и дали навистина треба да се грижиме, важно е да разбереме зошто доаѓа до опаѓање на косата.

Најважната информација – опаѓањето на косата по бременоста е привремено и не треба многу да се грижите.

Прекумерното опаѓање на косата често се случува 3-6 месеци по породувањето, а во овој период се јавуваат хормонални промени кои влијаат врз циклусот на раст на косата. Главниот играч во оваа приказна е естрогенот, главниот женски хормон. Нивото на естрогенот брзо опаѓа по породувањето, што ја поттикнува косата да влезе во телогена фаза или фаза на одмор. По телогената фаза, косата го завршува својот циклус и опаѓа. Ваквото опаѓање на косата е привремено и трае од 3 до 6 месеци. Со текот на времето, нивото на хормоните се стабилизира и косата повторно расте.

Како да препознаеме дека се работи за постпородилно опаѓање на косата?

Прекумерното опаѓање на косата најчесто се јавува 3-4 месеци по породувањето. Во некои случаи, може да започне во вториот месец и да трае до една година по раѓањето. Овој вид губење на косата може да се појави на делови, или низ целиот скалп. Косата може да стане видливо потенка, особено околу линијата на растот на косата, по должината на челото или кај залистоците. Некои жени известуваат дека косата им опаѓа во прамени додека ја чешлаат или ја мијат.

Чекори за олеснување на фазата на прекумерно опаѓање на косата

Нежно измијте ја косата со соодветни шампони без сулфати или материи за зајакнување на косата. Интернетот е полн со совети за избор на шампон. Имајте на ум дека некои шампони со биотин, колаген или омега-3 масни киселини можат да бидат и корисни и штетни, затоа дефинитивно препорачуваме да се консултирате со вашиот дерматолог, кој може да ви помогне да го запознаете вашиот скалп пред да започнете сами да го лекувате.

-Избегнувајте стегнати фризури кои можат да ви ја повлечат или оштетат косата – коњско опавче, плетенки…

-Кога имате можност, дајте ѝ одмор на вашата коса од прекумерна изложеност на топлина – фен, пегла за коса или пегли за виткање.

-Обидете се да ја исушите косата на природен начин додека го заспивате вашето бебе или се одморате.

-Користете помалку производи за обликување на косата како што се лак за коса, пена за волумен и сув шампон.

-Здрава исхрана – вклучете доволно количество хранливи материи, особено витамин Д и биотин и железо. За дополнување, консултирајте се со вашиот лекар.

-Избегнувајте стрес – бидете свесни дека овие моменти се бесценети и за вас и за вашето бебе. Иако постојат многу причини за загриженост и незадоволство со вашето дете, бидете нежни кон себе и кон вашето бебе, најдете ситни причини за среќа во секој ден и свесно активирајте го вашиот хормон на среќата.

Кога треба да бидете загрижени?

Доколку опаѓањето или видното проретчување на косата продолжи до една година по породувањето, тогаш време е за трихолошки преглед кај дерматолог. Постојат состојби како алопеција ареата или нерамнотежа на тироидните хормони, кои можат да влијаат врз губењето на косата. Важно е да се исклучат или да се дијагностицираат такви состојби за да може да се спроведе правилен третман под надзор на лекар.

Постпородилниот период носи голем број фрустрации, но обидете се да ја погледнете пошироката слика. Прегрнете ги вашите бебиња, развијте чувство на блискост и припадност, бидете нежни со себе и грижете се за вашето здравје. Ако нешто ве загрижува, разговарајте за тоа. Секој проблем има своја адреса за решение. Консултирајте се со експерти.

Автор: д-р Микела Петковиќ/дерматовенеролог

Извор