Прашањата до психолозите и психотерапевтите може да ги испраќате на е-пошта: prasajpsiholog@deca.mk. Ве молиме прашањата пишувајте ги на кирилица. Нашето мото е: Кој прашува, дејствува! Кој си молчи, претпоставува!

ПРАШАЊЕ: Мојата ќерка има 2 години и 8 месеци. Многу е темпераментна, не застанува на едно место, зборува сто на саат и проблем е кога сака нешто, а нема да го добие – тогаш прави големи драми. Знае да гребне некое детенце, да ме касне мене, сама да се касне, да писка, да бара по секоја цена да го добие тоа што го наумила. Јас тогаш ја карам, знам и да ја удрам по задникот или да ја штипнам, да види дека тоа што им го прави на другите боли, но ни тоа нема ефект. Би ве замолила за совет зашто сигурно грешам некаде.

ОДГОВОР: Децата на оваа возраст се склони кон тантрумизација и излив на бес при фрустрации. Тантрумите имаат цел да го хармонизираат психо-емоционалниот развој на детето во периодот од втората до третата година кога играат и биолошка улога. Подоцна негодувањето со излив на бес не станува класичен тантрум, туку механизам за да се добие нешто.

Она што би можеле да го направите во моментот е конзистентно и доследно да ја поставите границата НЕ и тоа да биде карактеристика за двајцата родители. Потоа да се намали просторот на угодување, односно нештата да бидат лесно достапни, а со тоа и лесно да се добиваат работите. Креирајте досада која ќе ја пополнува со симболичка игра, работа со глина, на пример, боење каменчиња, шишарки и работи од природата со водени боици, игра со вода, танцување, читање книги итн.

Остатокот од времето обидете се да го структурирате со тоа што ќе наметнете ред и правила на функционирање. На тој начин полесно ќе ги поставите границите. За да поставите граница и таа да биде испочитувана, најпрвин треба дневната динамика да има ред, структура и наметнати функционални правила.

Одговара: Христина Стефановска, психолог за деца и адолесценти, Здружение „Хармоничен свет“, е-пошта: hristina_psihologija@yahoo.com

Психолозите и психотерапевтите ги одговараат прашањата според редоследот на нивното испраќање, а одговорите ќе се објавуваат на Деца.мк. Одговорите имаат психоедукативна функција и ги насочуваат родителите кон посеопфатни насоки на решавање на состојбата што ги мачи. Се разбира, покомплексните прашања подразбираат покомплексен пристап.

Рубриката „Прашај психолог“ овозможува стручна поддршка од психолози и психотерапевти на родителите при справување и решавање одредени актуелни прашања од психолошка природа на нивните деца и е резултат на соработка помеѓу Деца.мк и „Психотерапика“ – здружение за психологија и психотерапија. На прашањата одговараат психолози и психотерапевти, членови и соработници на здружението, како и самостојни експерти, соработници на Деца.мк.