Прашањата до психолозите и психотерапевтите може да ги испраќате на е-пошта: prasajpsiholog@deca.mk. Ве молиме прашањата пишувајте ги на кирилица. Нашето мото е: Кој прашува, дејствува! Кој си молчи, претпоставува!

ПРАШАЊЕ: Мојот син наскоро ќе пoлни 7 години и оди во прво одделение. Неговиот проблем е стравот кој веќе подолг временски период е присутен кај него. Не може да заспие и кога ќе заспие, се буди 2-3 пати во ноќта со изговор да пие вода, а најчесто оди во тоалет. Преку ден не може сам да оди во тоалет, а на училиште трпи за да не оди во тоалет бидејќи му е страв. Многупати разговараме со него и ни вели дека се плаши од чудовиште. Инаку е многу социјален, на училиште е добар и за сѐ може да се разговара со него. Не знаеме како да го решиме проблемот. Ве молам да нѐ посоветувате како да пристапиме бидејќи ова трае повеќе од една година.

ОДГОВОР: Стравот е емоција која се јавува по одредена мисла, слика или асоцијација која има вознемирувачки карактер, продуцира чувство на страв и однесувањето на детето почнува да се менува, во ситуацијата манифестирајќи се во сонот преку одложено заспивање, често будење, одбегнување некои простории како тоалет итн.

Убаво е што вашето дете го препознава и го именува чинителот за таквиот страв. На тој начин ви овозможува лесно да му пристапите и да го канализирате. Ви го препорачувам прирачникот за регулирање на чувството на страв „Кога Ушко се плаши“ во кој конкретно треба да ја сработите приказната „Ушко се плаши од чудовишта разни“ и вежбите што следуваат по неа. Доколку однесувањето продолжи, обратете се на детски психолог.

Одговара: Христина Стефановска, психолог за деца и адолесценти, Здружение „Хармоничен свет“, е-пошта: hristina_psihologija@yahoo.com

Психолозите и психотерапевтите ги одговараат прашањата според редоследот на нивното испраќање, а одговорите ќе се објавуваат на Деца.мк. Одговорите имаат психоедукативна функција и ги насочуваат родителите кон посеопфатни насоки на решавање на состојбата што ги мачи. Се разбира, покомплексните прашања подразбираат покомплексен пристап.

Рубриката „Прашај психолог“ овозможува стручна поддршка од психолози и психотерапевти на родителите при справување и решавање одредени актуелни прашања од психолошка природа на нивните деца и е резултат на соработка помеѓу Деца.мк и „Психотерапика“ – здружение за психологија и психотерапија. На прашањата одговараат психолози и психотерапевти, членови и соработници на здружението, како и самостојни експерти, соработници на Деца.мк.