Хормонски промени и промени на расположението, стрес, голем број неочекувани промени на телото – ова ја отсликува бременоста и породувањето кај една жена. Се верува дека целиот тој процес не доведува до промени кај татковците бидејќи тие не ги носат бебињата и не ги раѓаат. Но, неодамнешни студии покажале дека и мажите доживуваат хормонски, невролошки и промени во однесувањето.

Кои се промените што се одвиваат во телата на мажите, за кои тврди науката?

Тестостеронот е „машки“ хормон кој е одговорен за развивање на машките репродуктивни функции и ги мотивира мажите да најдат партнери. Студиите покажале дека мажите со повисоки нивоа на тестостерон имаат поголеми шанси да бидат атрактивни за жените. Нивото на тестостерон кај новите татковци може да се намали на 34 проценти. Научниците веруваат дека ова може да биде објаснето со фактот дека мажите што добиле ново дете го свртиле фокусот на своето внимание кон семејството и ѝ одолеале на желбата да бараат друг партнер. Дополнително, колку е помало нивото на тестостерон кај новиот татко, толку повеќе тој се грижи за детето и извршува задачи во домот поврзани со него.

Научниците ја изучувале врската помеѓу вклученоста на новиот татко во активностите поврзани со детето со неговите нивоа на хормони, па дошле до интересен заклучок. Татковците што активно играле со своите деца имале повисоки нивоа на окситоцин во крвта во споредба со оние што биле помалку вклучени. Окситоцин е хормон кој е одговорен за релаксација, љубов, позитивни чувства, како и за силните врски помеѓу луѓето. Неговото ниво природно се зголемува кај новите мајки по породувањето.

Студијата била спроведена на 16 нови татковци и покажала дека машките мозоци демонстрирале исти промени како оние што се случуваат кај новите мајки. Регионите во мозокот поврзани со приврзување, емпатија и способност за комуникација со детето имале во поголема мера сива и бела материја во период помеѓу 12. и 16. недела од бременоста, во споредба со почетокот од бременоста.

Научниците веруваат дека овие структурни мозочни промени покажуваат дека идните татковци ги развиваат потребните родителски вештини во согласност со развивањето на бременоста на жената. Лекарите се сигурни дека на овој начин мозоците на татковците се обидуваат да се осигурат дека можат да креираат врска со своето дете иако тие не се оние што го носат детето.

Постнаталната депресија е нарушување на расположението предизвикано од бременоста и породувањето и вообичаено вклучува тага, безнадежност, анксиозност и иритација. Истражувачите веруваат дека постнаталната депресија не е проблем што ги засега само жените. Студиите покажале дека околу 10 отсто од мажите ја доживуваат оваа појава. Ова може да е предизвикано од ниските нивоа на тестостерон кај новите татковци. „Нискиот тестостерон може да доведе до чувства на летаргија и немање интерес за нормалните задоволителни активности, што е дел од депресијата“, вели Дарби Саксби, асистент професор по психологија на Универзитетот во Јужна Калифорнија.

Интересно е и тоа што жените чии партнери имаат ниски нивоа на тестостерон, по породувањето имаат помалку симптоми на постнатална депресија. Зошто е така? Изгледа дека партнерите со низок тестостерон се повеќе вклучени во врската и покажуваат повеќе емоционална поддршка за своите жени, што ги намалува нивните шанси за депресија.