Дехидратацијата претставува состојба на организмот кога тој губи повеќе течности отколку што внесува. Нашето тело се состои од две третини вода, па затоа е важно таа течност соодветно и редовно да ја обновуваме со внесување доволна количина вода во текот на денот. Хидратацијата е важна за општото здравје на организмот, а особено е важна за мајките што дојат. За време на доењето од телото на мајката се „користи“ голема количина вода, поради што е важно таа да пие доста течности за да го олесни и поттикне создавањето на млеко. Ова значи дека доколку мајката не пие доволно течности – ниту за бебето нема да има доволно млеко.
Колку вода се препорачува за доилките?
На мајките што дојат им се препорачува вообичаената количина вода во текот на денот што им е потребна на сите, а препорака е и по секое доење да се испие една чаша вода – за да се надомести изгубената течност од организмот. Најдобар начин за телото да остане хидрирано е да се пие по малку течност во текот на целиот ден – наместо „налевање“ одеднаш. Така телото ќе ја апсорбира потребната количина секојпат кога ќе испиеме малку вода, а „вишокот“ ќе го спроведе до мочниот меур.
Како да се препознае дехидратација кај мајките што дојат?
– Сува уста: прв симптом на дехидратација.
– Темна урина: еден од начините во вистинско време да забележите дека на вашиот организам му треба повеќе вода.
– Зголемена жед: „аларм“ на телото да го зголемите внесот на вода.
– Главоболка: доаѓа до главоболка бидејќи со помал внес на вода во организмот телото не добива доволно течности, а за правилна работа на сите органи во телото потребни ни се околу 8 чаши вода дневно (бројот варира од лице до лице).
-Вртоглавица.
-Замор.
-Раздразливост.
-„Мозочна магла“: односно когнитивна дисфункција, чувство на деконцентрираност и слаб фокус.
912