Д-р Маја Милосављевиќ, психијатар, објаснува за постпородилната тага и депресијата во емисијата „Уранак“ на српската телевизија „К1“:

-Тешко е да се најде мера, но не е невозможно. Во последниве години се промовираше модерното родителство и како да се биде најдобра верзија на родител, а заборавивме дека родителите треба да бидат најдобрата верзија од себе за да можат да се справат со здравото родителство – изјавила д-р Маја Милосављевиќ, а потоа објаснила што е постпородилна тага.

-Тоа е појава која се јавува кај висок процент од жените по породувањето. Обично започнува помеѓу третиот и петтиот ден и трае најмногу две недели. Во овој период може да се забележат промени во расположението, како нагласено плачење без јасна причина, раздразливост, проблеми со спиењето и апетитот, како и сомнеж во себе. Оваа состојба ја сметаме за физиолошка, предизвикана од значителни хормонални промени кои настануваат по породувањето – изјавила д-р Милосављевиќ и додала:

-Меѓутоа, ако овие симптоми траат подолго и ја попречуваат мајката во грижата за себе и за бебето, како и во доењето или одржувањето на партнерските односи, тогаш можеме да размислуваме за постпородилната депресија како патолошко нарушување.

Доктор Милосављевиќ нагласува дека постпородилната депресија, доколку не се лекува, може да трае со години. Може да помине спонтано во период од шест месеци до една година, но успешно се лекува, што е многу важно да се нагласи.

Симптоми: Тажно расположение кое трае подолго од две недели, раздразливост, неможност за уживање во секојдневните активности, нарушувања во сонот и апетитот, прејадување, проблеми со концентрацијата, неодлучност, тешкотии во размислувањето, чувство на вина, страв од губење контрола и грижа дека би можела да го повреди детето, па дури и мисли за намерно да му наштети на детето.

Лекарката истакнува дека и мажите можат да доживеат постпородилна депресија.

-Татковците, исто така, се во нова улога, соочени со лични очекувања кои често не се само социјални. Тие си поставуваат прашања за нивната способност да се грижат за своето семејство и дете, да се грижат за нив и размислуваат како можат да ѝ помогнат на партнерката. Во тој процес често се соочуваат со виор од емоции, што може да доведе до депресија – објаснила докторката, додавајќи дека на Балканот сѐ уште е срамота жените да имаат постпородилна депресија.

Извор