Бирото за развој на образованието го објави новиот список на задолжителни и изборни лектири кој ќе важи од наредната учебна година. Списокот содржи листи за задолжителна и изборна лектира за секое одделение, од второ до деветто

„Кифличката Мирна“ од Оливера Ќорвезироска, „Легенди за Марфи Компирката“ од Овен Колфер, „Скокни – прескокни“ од Васил Мукаетов се дел од поновите наслови што влегоа во новиот список со лектири од второ до деветто одделение, кое го подготви Бирото за развој на образованието. Светската класика „Малиот принц“ од Антоан де Сент Егзипери се враќа повторно во задолжителна литература во деветто одделение. Оваа книга во последните неколку години не беше задолжителна, а беше оставено на наставниците да проценат кога и дали би ја работеле, во зависност од интересот на учениците.

На линкот може да ги видите сите лектири и на другите јазици на кои се изведува настава во Македонија.
Во наредната учебна година основците ќе читаат лектири според новиот список што деновиве го објави БРО. Откако минатата година беше објавен јавен повик за ревидирање на списокот, до БРО стигнаа многу предлози.
Постојниот список е изменет и дополнет. Дел од книгите се поместени од една во друга година или од задолжителни во изборни лектири. „Снежана“ ја нема во второ одделение, „Шеќерната приказна“ ќе се учи во четврто наместо во трето како досега.

Списокот содржи листи за задолжителна и изборна лектира за секое одделение од второ до деветто, и тоа за: македонски јазик, албански јазик, турски јазик и српски јазик. Списоците беа предмет на јавна расправа и отворени за предлози. Предлозите беа земени предвид и внесени според критериуми за избор на лектира во основното образование, изработени во БРО.

– Промените во списокот се направени во сите одделенија, од второ до деветто одделение. Генерално, порано имаше само листа со лектири за кои се подразбираше дека се задолжителни. Сега има дел задолжителни и дел изборни. Внесени се понови наслови од нашата литература, но и од онаа што се преведува. Се внимаваше да бидат застапени различни видови книги, оние што се класика, како и понови наслови, поезија, проза и драма согласно Наставната програма за тековното одделение – објаснува Марина Димитриева-Ѓорѓиевска, советник по македонски јазик во БРО.

Списокот со лектири имаше неколку фази: истражување за состојбите, прелиминарен список од работна група во која учествуваа професори од катедрите за книжевност при Филолошкиот факултет „Блаже Конески“ – Скопје, јавна дебата.

– На јавната дебата, која се одвиваше онлајн преку страницата на МОН во почетокот на 2018 година, свои дополнувања и предлози даваа: колеги наставници, активи на наставници, родители, институции, Институтот за македонска литература, ДПМ, издавачки куќи. Одѕивот беше навистина голем. Предлозите беа разгледувани од работна група на советници при Бирото за развој на образованието, одговорни за мајчините јазици. Списокот е дополнет согласно овие предлози, но истовремено не е затворена рамка, напротив, списокот со лектири е нешто што и понатаму ќе се гради, дополнува и менува – вели Димитровска-Ѓорѓиевска.

„Кифличката Мирна“ од Ќорвезироска реиздадена лани е во списокот со изборни лектири за трето одделение

Сите задолжителни лектири се обработуваат. Од наведените изборни наслови во секое одделение, наставникот одбира толку колку што е означено со вториот број. Наставникот го прави изборот согласно условите во кои работи и не е обврзан во секоја паралелка од истото одделение да работи иста книга, појаснуваат од БРО.