Во периодот од март до мај 2021 година преку социјалните мрежи спроведовме анкета во која сакавме да ги испитаме размислувањата на мајките за нивното искуство во текот на глобалната пандемија. Учествувале 677 учесници од Србија, од кои 78,6 отсто вработени, а 19,4 отсто доаѓаат од село и од помали средини. Нè интересираше колку на мајките им изгледало покомплицирано да ги извршат дневните обврски во периодот на ковид-кризата. 44 проценти од учесниците изјавиле дека тоа им било покомплицирано, 13 проценти многу покомплицирано, додека 35,6 проценти изјавиле дека односот на дневни обврски не се променил. 47,7 проценти од учесниците сметаат дека сега имаат повеќе обврски во споредба со порано. Ги прашавме мајките и како би го процениле снаоѓањето во оваа криза.

Резултатите покажуваат дека повеќето мајки добро се снаоѓаат (73 проценти главно добро, 18,3 проценти одлично). Исто така, 35 проценти од учесниците не чувствуваат сигурност во текот на оваа криза. 20 отсто од учесниците не знаат да проценат дали чувствуваат сигурност или не. Повеќе од 70 отсто од учесниците сметаат дека на работа немаат никаква предност во однос на вработените што не се родители – во текот на пандемијата. На конференцијата се расправаше за овие податоци со експерти на панелот под наслов „Влијанието на пандемијата врз квалитетот на животот на мајките“. Социологот Ивана Шешо го истакна фактот дека различните семејства немаат исти услови дома, ниту ист број простории, ниту ист број деца, ниту исти технолошки можности – нешта на кои, за жал, не сме биле целосно сензибилни во текот на пандемијата.

Професорот по географија Дејан Немчиќ ја истакна и важноста од комуникацијата меѓу родителите и учителите за да се добие подобар увид во нивната ситуација и да им се помогне на децата да поттикнуваат добри училишни резултати. Психологот и психотерапевтот Миа Роја Ѓапиќ ја истакна и важноста од дополнителни истражувања за да се добијат појасни резултати за вистинското влијание на пандемијата врз мајките и родителството. Мајките беа прашани и за нивниот однос со децата во текот на пандемијата. 46,1 проценти од мајките сметаат дека пандемијата имала влијание врз односот со нивните деца, и тоа 62,2 отсто сметаат дека тој однос е подобар од порано. За жал, 37,8 отсто уочуваат дека нивниот однос е полош од порано. Ги прашавме мајките што би им помогнало да се чувствуваат посигурни во изборот помеѓу безбедноста на работа, повеќе помош околу децата или повеќе финансии – 30,7 отсто од мајките изјавиле дека сето наведено би им помогнало. На 21,9 отсто би им помогнало да имаат повеќе помош околу децата, 9,9 отсто сакаат безбедност на работа, а 27,2 отсто повеќе финансии. 9,9 отсто изјавиле дека би им помогнало нешто друго, а некои од тие работи и нам ни ги наведоа. Меѓу тие одговори, најмногу беа оние што споменуваат престанок на пандемијата или враќање во нормалниот живот.

Многу мајки се согласуваат дека би им помогнало и престанокот на медиумското известување за пандемијата, или промена во известувањето кон малку позитивни информации. Неколку мајки истакнаа дека би им помогнала психолошка помош, повеќе време за себе или поголем контакт со семејството. Многу мајки се согласиле дека би им помогнало да знаат дека поголемиот дел од популацијата се вакцинирани. Кога мајките ги прашавме дали чувствуваат дека им е потребна психолошка помош, дури 48 отсто изјавиле дека им е потребна. Меѓутоа, само 14,7 отсто од тие мајки побарале таква помош. 63,3 отсто од мајките не побарале бидејќи сметале дека самите може да издржат, а 16,8 отсто не можат да си ја дозволат таквата помош. На крајот, ги прашавме дали се среќни. 66,8 отсто изјавиле дека се среќни, и покрај сè. 20,7 отсто едноставно рекле „да, среќна сум“, 12,7 отсто од мајките не се чувствувале среќни. Целата расправа за резултатите од анкетата може да се погледне на снимката од конференцијата.

Извор