Работата на жена која не е вработена, а е и мајка, е можеби најнеблагодарната на светот бидејќи малкумина сфаќаат колку напорна работа вклучува целиот тој процес. Во споредба со другите работни места, мајките домаќинки никогаш не добиваат финансиска компензација, бидејќи се грижат за секој агол од домот и за детето или децата по цел ден.

Неодамнешна студија на „Иншур“ ја пресметала нивната плата, земајќи ја предвид количината на работа и напор што мајките и домаќинките ги вложуваат во нивната секојдневна работа.

Било пресметано дека годишниот приход на американска мајка, доколку била платена за работата во домот во изминатата година, би изнесувал 135.717,57 евра.

Истражувачите ја користеле пазарната вредност на реалната работна сила. Платата на домаќинка или родител кој останува дома зависи од различни фактори, како што се големината на домот, семејството, домашните миленици и други услови. Сепак, некои процени се дека просечната годишна плата за категоријата домаќинка во Соединетите Американски Држави е 49.055 долари, просечната плата по час за домаќинка е 21,28 долари, а просечната годишна плата за родител кој останува дома, доколку биде платен за сите негови услуги, би изнесувала 178.201 долар.

На пример, тие ја одредиле часовната стапка на готвачот, а потоа ја помножиле таа бројка со часовите што мајките ги поминуваат во кујната. Тие го правеле ова за секоја задача, од подучување и пишување домашни задачи до чистење на куќата.

-На пример, проценивме дека една мајка може да помине 14 часа неделно готвејќи. Готвачите заработуваат 15,78 евра на час. За 14 часа готвење неделно, во текот на 52 недели, „Иншур“ го утврди годишниот надомест за подготовка на оброци за една жена на 11.484 евра. Потоа уредниците ја додадоа платата за готвење со платите за вообичаените задачи што ги извршуваат мајките и дојдоа до годишната плата на домаќинка која не оди на работа – открива студијата.

Маршалов план за мајки

Планот предложен од Решма Сауџани, основачка на „Девојки кои кодираат“, во колумна, предлага мајките да добиваат 2.321 евро месечно како надомест за нивната често „невидлива“ работа.

Во 2020 година Сауџани го повикала тогашниот новоизбран претседател на САД, Бајден, да формира „работна група посветена на спроведување на Маршаловиот план за мајки“ во текот на неговите први 100 дена од мандатот. Таа напишала дека планот треба да вклучува платено родителско отсуство, прифатлива грижа за децата и рамноправност во платите.

Иако Бајден никогаш не одговори на нејзиниот предлог, тоа дефинитивно отвори разговор за тоа колку мајки се заглавени во своите неплатени обврски и сите други работи во нивните животи.

Мајки – омилени родители

Студија од 2019 година објавена во списанието „Сексуални улоги“ покажала дека 90 проценти од мајките во брак или со партнер се чувствуваат единствено одговорни за своите деца и домаќинството, а 8 од 10 мајки рекле дека се одговорни за односите со наставниците и училиштето на своите деца.

Слично на тоа, длабинска студија спроведена од „Галуп“ и „Материли Ануел“, насловена како „Состојба на мајчинството“, покажала дека жените сè уште се претежно омилени родители, без разлика колку се зафатени со својот професионален живот.

66 проценти од мајките велат дека се очекува од нив да се справат со родителските кризи и кризите поврзани со грижата за децата, во споредба со само 22 проценти од татковците. Мајките, исто така, имаат двојно поголема веројатност од татковците да одбијат унапредување, да работат со скратено работно време или целосно да ја напуштат работата поради семејни обврски.

Покрај тоа, мајките кои се справуваат со лични и професионални обврски на дневна основа имаат 81 процент поголема веројатност да доживеат „прегорување“ во споредба со оние што не го прават тоа.

Сауџани признава дека нејзиниот предлог нема да ги реши сите проблеми со кои се соочуваат мајките, но во воведниот текст истакнала дека тоа барем ќе почне да го намалува големото занемарување на вредноста на неплатената, невидена и неценета работа на мајките.

Извор