Искусните мајки многу добро знаат дека половина од парите што ги потрошиле за работи за првото бебе сега би ги вложиле попаметно. Како и дека на идните мајки сигурно би им подариле покорисни и попаметни работи – на пример, посета на курс за исхрана, убава ноќница, водич за справување со бебето… И додека идната мајка (и сите околу неа) полека се подготвува за доаѓање на идниот најсладок член на семејството во тие девет месеци, подготовката за периодот по враќањето од болница целосно се заборава. Периодот кој можеби е најпредизвикувачки за сите – постпородилниот период (периодот кој започнува со раѓањето на детето и трае приближно 40 дена).

Една од најпознатите хрватски сертифицирани дули и постпородилни едукатори, Уна Пашиќ Греговиќ, зборува за важноста на постпородилниот период и подготовката за овој прекрасен, но и предизвикувачки период. Уна е и еден од основачите на Центарот „Мати“ – сеопфатен центар за мајки, трудници и жени, единствен во Хрватска.

Уна секогаш нагласува дека со раѓањето на детето секогаш се раѓа и една нова мајка. И да, кога зборуваме за постпородилниот период – мајката е најважна. Затоа што кога е добро мајката, и бебето е добро. Уна споделува конкретни начини на кои секоја идна мајка може да се подготви за еден од најинтензивните периоди во нејзиниот живот.

И уште поважно, какви корисни работи можат да направат членовите на нејзиното семејство и пријателите.

Исхрана

Постпородилната жена има потреба од 2-3 пати повеќе хранливи материи за најдобро можно закрепнување по породувањето. Во Славонија, вообичаено е да ѝ се донесе зготвен оброк на мајката кога таа се враќа од болница со своето бебе – каков прекрасен гест. Ниту еден скап подарок не може да го замени топлиот, хранлив оброк во тие први недели. Затоа, ако се прашувате како да ѝ го олесните постпородилниот период на новопечената мајка, а сепак да не ѝ пречите – едноставно згответе хранлив оброк со љубов и однесете ѝ го на врата. Топлата, хранлива и лесно сварлива храна ќе ѝ помогне на мајката во производството на млеко и закрепнувањето на телото. И душата.

Одмор

Мајките често имаат нереални очекувања и сакаат нивниот дом да биде чист и уреден во текот на тој период. Меѓутоа, токму тогаш важно е мајката да се одмори, да лежи и да се поврзе со бебето. Во старите култури мајките не го напуштале креветот 40 дена. Единственото место каде што оделе бил тоалетот. Тие само лежеле, јаделе и се поврзувале со своето бебе. За сѐ друго се грижеле членовите на семејството.

Заздравување

Во овој случај Уна ги препорачува сите практики што помагаат во заздравувањето, како што се фитотерапија (употреба на лековити растенија), масажи итн. Иако не се гледа однадвор, во телото на жената има рана со големина на дланка, па заздравувањето оди постепено и бавно.

Поддршка

„Ова е најважниот дел од закрепнувањето бидејќи кога мајката има поддршка, тогаш таа всушност има сѐ“, вели Уна. Поддршка може да биде и семејството кое ќе плати друга личност за чистење на станот, поддршка е присуството на пријател за мајката да знае дека не е сама, поддршка е и помошта и разбирањето од страна на нејзината мајка, а сопругот кој се грижи за мајката, всушност, се грижи за неговото дете. „Ако сте идна мајка, ако сте мајка во моментов или сте поддршка на некоја мајка – тогаш пристапете кон себе со истата нежност со која им пристапувате на децата“, нагласува Уна. А исхраната, одморот, заздравувањето и поддршката, иако ги сочинуваат столбовите на постпартумот, всушност се и столбови на женското здравје и грижата за себе.

Извор