Иако поголемиот дел од животот го поминуваме мислејќи дека нема да бидеме како нашите родители, честопати сме такви. Иако не сакаме партнер кој е ист како еден од нашите родители – на крајот често наоѓаме токму таков.

Децата кои не се согласуваат со еден од нивните родители често ќе кажат дека никогаш не сакаат да бидат со некоја личност што е таква подоцна во животот. Често тоа се ќерките, кои се решени да не најдат некој што е како нивниот татко – се разбира, ако не се согласуваат со него, но тие наоѓаат токму таков партнер. Веројатно знаете барем неколку вакви примери во вашиот живот…

Психолозите велат дека е честа појава ќерките кои растат со емоционално недостапни или отсутни татковци да не најдат личност која ги задоволува нивните емоционални потреби подоцна во животот. Психологот Кејтлин Кантор посветува една статија токму на тоа. Таа вели дека во вакви случаи жените кои ќе се најдат во таква ситуација не постигнуваат квалитетна врска. Кога се деца, не мислат: „Татко ми е емотивно недостапен“, туку мислат: „Што е со мене, зошто тато не ме сака?“, односно се обвинуваат себеси. Во таквите врски ќерките, или воопшто децата, често се обидуваат да ја заслужат татковата љубов со тоа што ќе бидат „добри“ или со своите достигнувања. Тие се трудат да немаат премногу чувства или потреби и избегнуваат да бидат „проблем“. Секако, сето тоа го прават несвесно кога се деца. Дури кога ќе пораснат, можат да почнат да сфаќаат зошто се такви какви што се. Важно е да се препознае како емоционално недостапните татковци влијаат врз нивните ќерки, бидејќи раните што остануваат се значајни.

Оние што се мачат во своите врски, треба да знаат дека тоа не е нивна вина, ниту пак е нивна вина што нивните татковци не биле подобри родители. Како возрасни, ќерките на емоционално недостапните или отсутните татковци се мачат во односите со мажите. Еве како тие „рани“ од детството се појавуваат во нивните врски подоцна во животот, според д-р Кејтлин Кантор.

Ниска самодоверба

Емоционалната недостапност на нивниот татко ја доживеале како отфрлање. Тие не веруваат дека се доволно добри и дека заслужуваат љубов такви каква што се. Таквите ќерки избираат мажи кои нема да ги задоволат нивните потреби и секогаш ќе ги разочаруваат. Тие мислат дека мажите подобро би се однесувале со нив кога тие би биле подобри – исто како што мислеле за нивните татковци како деца. Навистина, мажите што ги избираат не се однесуваат подобро со нив затоа што не се способни за тоа, а не биле ни нивните татковци.

Страв од напуштање

Доколку таткото не бил доволно присутен, детето тоа го доживувало како форма на напуштање. Како возрасни жени во врски, тие несвесно прават работи за да го оттргнат партнерот од себе, пред тој да ги остави. Сепак, тие не сфаќаат дека го прават тоа, па на крајот се чувствуваат напуштени.

Потреба

Таквите луѓе можат да оттурнат некого од себе токму затоа што имаат премногу потреби и никогаш не чувствуваат дека можат да добијат доволно од друга личност за да ги задоволат нивните потреби. На крајот, личноста чувствува дека нема што повеќе да даде и врската завршува.

Избор на емоционално недостапни мажи

Друга опција е да изберете мажи кои се емоционално недостапни или оддалечени. Се трудат да немаат премногу потреби, но ни малкуте што ги имаат не се задоволени.

Тешкотии во градењето доверба

Тие се борат со довербата на мажите бидејќи нивната прва и најважна врска со маж не била безбедна за нив. Тие наоѓаат начини да ја тестираат љубовта на партнерот. Избегнуваат да бидат премногу ранливи.

Се обидуваат да ја заработат љубовта

Овие луѓе прават сè за својот партнер, верувајќи дека на тој начин ќе ја добијат саканата љубов. Тие се ставаат себеси на последно место, не поставуваат граници и не го очекуваат истото за возврат.

Пребрза приврзаност или неможност за приврзаност

Многу од нив сакаат да бидат сакани, но не знаат како да ја примат таа љубов, бидејќи немале можност да научат кога растеле. Примањето љубов е вештина. Како резултат на тоа, тие брзо се врзуваат за емотивно недостапен маж, кој никогаш нема да им ја даде љубовта што ја посакуваат. Или нема да се обврзат за некој кој може да им пружи љубов, бидејќи сè уште немаат вештини да ја примат. Често не ги привлекуваат мажи кои се емотивно достапни и кои сакаат да ги сакаат и да бидат со нив.

Користење на сексот за потврда на самодовербата

Ех, ова е често болна точка за родителите и нешто за што не сакаат да размислуваат. Сепак, ова е една од последиците од ваквиот однос во детството. Сексуалниот однос често се избира како начин и обид да се заработи љубовта што толку очајно ја посакуваат.

Желба за машко внимание

Со цел да привлечат внимание, таквите луѓе често претерано флертуваат, бидејќи кога добиваат внимание од мажите, се чини дека се чувствуваат добро во врска со себе. Сепак, поттикот што го добиваат од вниманието не трае долго.

Ставање на мажите на пиедестал

Тие гледаат на мажот што им се допаѓа како на многу подобар отколку што всушност е. Ги гледаат мажите во црно-бело, обично целосно позитивно, отфрлајќи ги недостатоците или проблематичното однесување.

Не ги привлекуваат добри момци

Таквите жени сакаат љубов од некој како нивниот татко, кој не можел да им ја даде потребната љубов. Се обидуваат да ги залечат раните од детството барајќи емоционално недостапни мажи, кои не ги третираат добро и во исто време се обидуваат да ги натераат да се променат и да ги сакаат. Несвесно мислат дека можат да си ги залечат раните. Но, тоа никогаш не се случува, сè додека не работат на тоа и не сфатат дека никогаш не биле одговорни за недостигот на емоционална достапност на нивниот татко.

Автор: Луна Николиќ

Извор