Децата „инфлуенсери“ рекламираат нездрава храна и нездрави пијалаци за милијарда гледачи преку презентација на продукти, се вели во нова студија. Истражувачите анализирале 418 видеа на „Јутјуб“ од топ-5 деца-инфлуенсери на платформата за 2019 година и откриле дека од 179 видеа во кои биле вклучени храна и пијалаци, околу 90 отсто промовирале брендови на нездрава – брза храна.
Овие видеа биле гледани од повеќе од 1 милијарда луѓе.
– Навистина беа рекламирани брендови на нездрава храна и тоа беше најголемиот шок од видеата – изјавила Мери Брег, автор на студијата и асистент-професор за исхрана и јавно здравје во Школата за глобално јавно здравје при Универзитетот во Њујорк. Родителите на децата-инфлуенсери ги објавуваат видеата од нивните деца додека тие играат со играчки или ги отвораат подароците. Според студијата, најплатениот јутјуб-инфлуенсер во 2019 година бил Рајан Каџи (Светот на Рајан), кој тогаш имал 8 години. Заработил 26 милиони со реклами, спонзорирани објави и презентација на продукти. Едно од видеата на Рајан со 46 милиони прегледи покажува како тој носи капа со логото на „Мекдоналдс“ преправајќи се дека е продавач и прави чизбургери.
– Мекдоналдс САД не е партнер со децата инфлуенсери под 12-годишна возраст за платени содржини низ каналите од социјални медиуми, вклучително и „Јутјуб“, а ние не плаќаме и не стануваме партнери со кој било од инфлуенсерите идентификувани во студијата – стои во соопштението на компанијата.
– „Кока-Кола“ е посветена на одговорен маркетинг и не вршиме маркетинг преку деца под 12 години. Не ни целиме кон рекламирање преку содржини чија целна група е публика која е со над 35 проценти деца. Тоа се подразбира и за маркетингот преку телевизија, радио, печатење, интернет и мобилни телефони. Исто така, не најмуваме деца инфлуенсери – стои и во соопштението на „Кока-Кола“.
Истражувањето посочува дека младите деца се особено подложни на маркетинг – дури и повеќе кога инфлуенсер промовира производ. „Децата се специјална публика“, вели Мајкл Роб, директор на истражувањето во „Комон Сенс медиа“.
„Има специфични когнитивни ограничувања кои децата ги имаат што прават да им биде тешко на децата помали од 7 години навистина да ја сфатат намерата на огласувачите“. Роб мисли дека комерцијалното рекламирање таргетирано на мали деца треба да биде или елиминирано или соочено со строги рестрикции, особено на дигиталните платформи како „Јутјуб“.
Има строги регулации за маркетингот на телевизија, додава тој, но тоа правило не се однесува на „Јутјуб“. Во реалноста, децата формираат дури и поблиски емоционални врски со инфлуенсерите што ги гледаат на „Јутјуб“ поради интимната природа на платформата.
– Децата ги имаат тие когнитивни ограничувања кои ги спречуваат навистина да сфатат што е реклама и формираат емоционални приврзувања со омилените ликови и особини. Екстремно е тешко за децата да бидат способни да ја сфатат намерата на огласувачот или инфлуенсерот во однос на тоа што е нивен најдобар интерес – вели Роб.
фото извор: Ryan’s World/ YouTube
Презентирањето на производот во видеата на инфлуенсерите е ефективно, вели Брег и додава дека родителите можеби имаат поголема моќ да ја променат содржината на рекламите што ги презентираат инфлуенсерите отколку што тие самите мислат, иако е тешко да се натпреваруваат со буџетите на огласувачките компании.
– Многу од овие инфлуенсери навистина инвестираат во својата база на обожаватели, па можам да замислам дека ако следбениците кажат дека би сакале да бидат комбинација од поздрави работи – тоа би можело да помогне да се промени насоката – вели таа. Додава дека решението не е да се постави целата вина врз децата инфлуенсери или нивните семејства бидејќи е тешко да се одбијат милиони долари. Наместо тоа, таа вели дека родителите и активистите може да извршат притисок врз компаниите да бидат поодговорни во однос на спонзорствата што ги промовираат.
– Како општество и како влада имаме одговорност да им помогнеме на родителите. Дебелината и коморбидитетите чинат многу пари, па ако можеме да поставиме политики и да извршиме притисок врз компаниите да ги променат своите практики, тоа е важно. Истражувачите ја повикуваат Федералната комисија за трговија да ги зајакне регулациите во однос на тоа младите инфлуенсери да не бидат користени за промовирање нездрава храна и пијалаци. Брег вели дека се случува нешто слично со сенаторите на Масачусетс и Конектикат, но нивните обиди за заштита на децата најмногу се фокусираат на производи од никотин и тутун.
Сепак, авторите сметаат дека се потребни дополнителни истражувања за дигиталните медиуми, инфлуенсерите и децата. „Важно е да постапуваме подобро во однос на овие нешта и да истражуваме за да се дојде до конечни решенија за заштита на децата“, заклучува Роб.
Автор: Сид Стоун
912