Прашањата до психолозите и психотерапевтите може да ги испраќате на е-пошта: prasajpsiholog@deca.mk. Ве молиме прашањата пишувајте ги на кирилица. Нашето мото е: Кој прашува, дејствува! Кој си молчи, претпоставува!

ПРАШАЊЕ: Имам близнаци – девојче и момче од 2 години. Сѐ уште не сакаат да јадат цврста храна. Не знам како да ги натерам да јадат.
Дополнителен проблем кај момчето е што во моментов му растат заби, па сега не сака да јаде никаква храна, дури ни пасирана. Пие само сок и млеко.
Плус, често има напади на нервоза при кои си ја удира главата. Хистерично писка и многу е нервозен. Се буди навечер на секои два часа и има напади на нервоза додека да заспие. Не знам како да му помогнам. Да напоменам дека сѐ уште не зборува, за разлика од сестра му која веќе сврзува и реченици.

ОДГОВОР: Се надевам дека досега сте направиле напредок во исхраната на вашите близначиња. Важно во исхраната на децата е тие да ги внесуваат сите хранливи материи и да напредуваат. Се разбира, полека би требало да биде присутно додавањето цврста храна и да се биде упорен. Таа упорност не би требало да биде со присила или казнување, туку со константно нудење поцврста храна.

Мислам дека би било добро да ја намалите употребата на сокови и млеко и полека да воведувате друга храна, супи, пире, пасиран зеленчук, јогурт итн.

Ве разбирам дека на моменти е многу напорно и обесхрабрувачки. Постепено потрудете се во испасираната храна да додавате парчиња поцврста храна, потоа да му давате и ставате в уста едно по едно парче поцврста храна, на пример, варен компир, морков, потоа месо, на овој начин полесно ќе може да ја почувствува храната.

Болката што ја чувствува вашето дете со растењето на забите дополнително ги отежнува овие процеси и доколку проблемот со исхраната продолжи, би било добро да посетите логопед и секако да поразговарате со вашиот педијатар.

Нормално и природно е понекогаш децата да се лути, незадоволни, фрустрирани, но проблемот со јазикот и зборувањето и неговата немоќност да се изрази го фрустрира и го прави многу понервозен, па поради тоа и се случуваат овие напади. Затоа, секогаш сопрете го кога ќе се обиде да се удира и кажете му: „Се налути, но не смееш да се удираш“. Одвраќањето внимание од она што го фрустрира често функционира, сѐ додека не се смири. Во тие моменти не треба многу да се зборува бидејќи тој не е во можност да го одржи вниманието и да го разбере она што му го зборувате. Гушнете го, погалете го, насмејте се. Објаснувајте му во моментите кога ќе се смири и тогаш би требало да бидете кратки и јасни.

Доста е напорно да се одгледуваат близначиња, особено на оваа возраст и како што можете да видите, и ним не им е лесно, но со големо трпение, топлина и љубов верувам дека полесно ќе се соочувате со сите нивни дневни предизвици.

Одговара: Билјана Манасова-Јовановиќ, дефектолог и психотерапевт; Психотерапија и советување 
е-пошта: sovetuvanje@gmail.com

Психолозите и психотерапевтите ги одговараат прашањата според редоследот на нивното испраќање, а одговорите ќе се објавуваат на Деца.мк. Одговорите имаат психоедукативна функција и ги насочуваат родителите кон посеопфатни насоки на решавање на состојбата што ги мачи. Се разбира, покомплексните прашања подразбираат покомплексен пристап.

Рубриката „Прашај психолог“ овозможува стручна поддршка од психолози и психотерапевти на родителите при справување и решавање одредени актуелни прашања од психолошка природа на нивните деца и е резултат на соработка помеѓу Деца.мк и „Психотерапика“ – здружение за психологија и психотерапија. На прашањата одговараат психолози и психотерапевти, членови и соработници на здружението, како и самостојни експерти, соработници на Деца.мк.