Прашањата до психолозите и психотерапевтите може да ги испраќате на е-пошта: prasajpsiholog@deca.mk. Ве молиме прашањата пишувајте ги на кирилица. Нашето мото е: Кој прашува, дејствува! Кој си молчи, претпоставува!
ПРАШАЊЕ: Ќерка ми има 3,5 години и сѐ уште не зборува целосно, работиме со логопед и почна да напредува со говорот, но не ја разбирам секогаш. Премногу е темпераментна, но дома намерно прави неред кога не е по нејзино или ако се почувствува запоставена. Оди во градинка и имаме проблем со тоа што ги кубе децата или сака да ги изгребе, но тоа го прави ненадејно, така што може првин да гушка или да милува некое дете, а потоа изненадно да го искубе или да го удри. Кога ќе ѝ врати некое дете, не плаче, го гледа и продолжува напред. Исто така, почесто му го прави тоа на истото дете. Ве молам за помош и совет!
ОДГОВОР: Недостигот на разбирлив говор и вокабулар е директно поврзан со фрустрираност и начин на регулирање на емоциите. Колку е понеразвиен говорот, толку е поголема фрустрацијата. Таквата фрустрација детето ја манифестира со агресивно поведение, удирање и гризење.
![](https://deca.mk/wp-content/uploads/2022/10/hristin.jpg)
За да го спречите ваквото однесување, потребно е да ѝ создадете невербални услови за изразување и канализирање на емоциите. Може да креирате такво катче во домот, ќоше кое е излепено со хартија или самолеплива табла на која може да чкрта кога е лута, сликички и картички со емоции исто така би ја поттикнувале да препознава и да ги поврзува емоциите со одредено однесување. Играње со тесто, глина, пластелин, кинестетички песок. Слушање музика на мајчин јазик, користење звучни сликовници и читање книги исто така би го подобриле вокабуларот и развојот на говорот. Многу прошетки надвор поминати во физичка активност се особено важни за амортизација на стресот и растоварување на емоционалниот набој.
Одговара: Христина Стефановска, психолог за деца и адолесценти, Здружение „Хармоничен свет“, е-пошта: hristina_psihologija@yahoo.com
Психолозите и психотерапевтите ги одговараат прашањата според редоследот на нивното испраќање, а одговорите ќе се објавуваат на Деца.мк. Одговорите имаат психоедукативна функција и ги насочуваат родителите кон посеопфатни насоки на решавање на состојбата што ги мачи. Се разбира, покомплексните прашања подразбираат покомплексен пристап.
Рубриката „Прашај психолог“ овозможува стручна поддршка од психолози и психотерапевти на родителите при справување и решавање одредени актуелни прашања од психолошка природа на нивните деца и е резултат на соработка помеѓу Деца.мк и „Психотерапика“ – здружение за психологија и психотерапија. На прашањата одговараат психолози и психотерапевти, членови и соработници на здружението, како и самостојни експерти, соработници на Деца.мк.
912