Прашањата до психолозите и психотерапевтите може да ги испраќате на е-пошта: prasajpsiholog@deca.mk. Ве молиме прашањата пишувајте ги на кирилица. Нашето мото е: Кој прашува, дејствува! Кој си молчи, претпоставува!

ПРАШАЊЕ: Моето дете има една година и 3 месеци и сѐ уште нема стекнато навика за спиење во правилни временски интервали. Многу често останува буден и по 7-8 саати без да има барем кратка дремка, активен е и сака да си игра иако покажува знаци дека му се спие (ги трие очињата и го чеша носето). Со сопругот пробавме на многу начини да го промениме ова, не играме пред спиење, имаме навика да се бања и потоа легнуваме, ги тргаме играчките, го гасиме светлото и се преправаме дека ние спиеме, но сѐ е залудно. Дури и мало конче од постелнината да најде, си се заигрува и не спие. Неодамна прооде и многу е активен, дури и сам се симнува од креветот и си оди во друга соба и си се заигрува иако е темница.
Не знам каде грешиме и се плашам дека можеби му штети тоа што е толку мал, а не спие доволно. Преку денот е доста активен, слушаме песнички, редиме коцки, играме, одиме, односно се трудам да го изморам колку-толку за да спие навечер, но изгледа тоа не е од помош. Ве молам за совет.

ОДГОВОР: Во овој период од развојот потребно е веќе да имате воспоставено дневни рутини и секако ритуал за заспивање со вашето дете. Редовните рутини пред спиење треба да бидат, на пример, капење, јадење, читање приказни или приспивни песни кои секогаш создаваат смирена атмосфера и го растоваруваат детето од стресот или ситуациите со кои се соочило во текот на денот. Во тој контекст ви ја препорачувам книгата „Приказни за добра ноќ на мама Ана“, која би ја читале пред спиење.

Во однос на рутините што сте ги постигнале со спиењето досега, не можам да забележам дали детето доцна заспива и доцна се буди, а со тоа е пролонгирано и задоцнето дневното спиење, бидејќи не ни давате податок околу распоредот на спиење. Тоа би значело дека утринското будење би било во 7:30 часот, кое би придонело детето да има пладневна дремка околу 12:30 максимум 13 часот, со што ноќното спиење би се довело до 21:00 часот. Бидејќи децата лесно го менуваат својот биолошки часовник, за ова би ви била потребна една седмица континуирано да го држите ваквото темпо. Во делот дневни рутини не го вклучуваме само спиењето, туку и активностите што се водат преку денот.

Убаво е да одлучите кои активности би ги правеле секој ден во исто време. Предлагам играње на музика, тоа може да биде и начин на расонување. Потребна е и максимална физичка активност во текот на денот. Доколку временските услови овозможуваат, тоа би биле неколку часа во природа, парк, игралиште, каде што главна активност треба да биде трчање, скокање, играње, шутирање топка, т.е. секоја игра што вклучува физичка активност. На тој начин мозокот ја користи својата енергија за да создаде повеќе синапси и овозможуваме да не се создава непотребна и акумулирана енергија во детето која би го попречувала спиењето. Она на што, исто така, треба да обрнете внимание е во овој период од развојот да не користите никаков технолошки уред со кој детето би поминувало време во гледање и седење. Запомнете, неговата главна активност во овој период треба да биде движење.

Одговара: Христина Стефановска, психолог за деца и адолесценти, Здружение „Хармоничен свет”

е-пошта: hristina_psihologija@yahoo.com

Психолозите и психотерапевтите ги одговараат прашањата според редоследот на нивното испраќање, а одговорите ќе се објавуваат на Деца.мк. Одговорите имаат психоедукативна функција и ги насочуваат родителите кон посеопфатни насоки на решавање на состојбата што ги мачи. Се разбира, покомплексните прашања подразбираат покомплексен пристап.

Рубриката „Прашај психолог“ овозможува стручна поддршка од психолози и психотерапевти на родителите при справување и решавање одредени актуелни прашања од психолошка природа на нивните деца и е резултат на соработка помеѓу Деца.мк и „Психотерапика“ – здружение за психологија и психотерапија. На прашањата одговараат психолози и психотерапевти, членови и соработници на здружението, како и самостојни експерти, соработници на Деца.мк.