Прашањата до психолозите и психотерапевтите може да ги испраќате на е-пошта: prasajpsiholog@deca.mk. Ве молиме прашањата пишувајте ги на кирилица. Нашето мото е: Кој прашува, дејствува! Кој си молчи, претпоставува!

ПРАШАЊЕ: Имам тригодишна ќерка која е средно дете во семејството, и во последно време сум навистина загрижена бидејќи не знам што ѝ се случува во таа мала глава. Таа премногу се идентификува, го имитира постариот брат, кој има шест години. Што и да направи тој, таа го прави истото, што и да каже тој, таа истото го повторува. Кога ќе земе да си игра со одредени играчки, таа баш тие ги сака, му се меша во играта, дури и ќе му ја расипе. Тогаш синот се нервира, почнува расправија помеѓу нив, плачење, викање. Некогаш не знам како да се поставам како родител, како да реагирам.

ОДГОВОР: Децата се склони да го моделираат однесувањето на повозрасните деца од нив. Во нивните очи повозрасните деца се покомпетентни, поспособни, посознајни, односно поинтересни за набљудување. На тој начин тие им дозволуваат на повозрасните деца да ги водат и тоа е во хармонија сѐ додека не се случи нивниот судир на интереси.

Во таквите ситуации, и поради нивната возраст, децата немаат доволно вештини да се справат со предизвиците, па најчесто бараат помош од родителите. Со цел да се развива нивната меѓусебна толеранција, можете да направите табела или, пак, теглички на кои ќе пишува „Јас сум добар брат или сестра“.

Најнапред објаснете кое е пожелното, а кое е непожелното однесување и залепете постери низ домот или направете книга со слики на таа тема. Потоа, секое пожелно однесување забележувајте го во табелата или евидентирајте го во тегличката. На крајот од неделата заедно проследете кај кого какво однесување преовладувало и пофалете го и поткрепете го пожелното однесување. Никогаш не заборавајте да го пофалите нивното добро поминато време или, пак, добар братски гест со зборовите: „Ти си многу добар брат/сестра“.

Одговара: Христина Стефановска, психолог за деца и адолесценти, Здружение „Хармоничен свет“, е-пошта: hristina_psihologija@yahoo.com

Психолозите и психотерапевтите ги одговараат прашањата според редоследот на нивното испраќање, а одговорите ќе се објавуваат на Деца.мк. Одговорите имаат психоедукативна функција и ги насочуваат родителите кон посеопфатни насоки на решавање на состојбата што ги мачи. Се разбира, покомплексните прашања подразбираат покомплексен пристап.

Рубриката „Прашај психолог“ овозможува стручна поддршка од психолози и психотерапевти на родителите при справување и решавање одредени актуелни прашања од психолошка природа на нивните деца и е резултат на соработка помеѓу Деца.мк и „Психотерапика“ – здружение за психологија и психотерапија. На прашањата одговараат психолози и психотерапевти, членови и соработници на здружението, како и самостојни експерти, соработници на Деца.мк.