– Долго време ги фалев родителите што поттикнуваат дарежливост и широкоградост кај своите деца. Цврсто сум убеден дека меѓу најважните родителски задачи е социјализацијата на децата за следната генерација да има силно чувство за другите. Но, има и простор за развој на себичност кај децата. Не зборувам за таа лоша особина. Себичноста кај децата може да ја зголеми самодовербата и да им овозможи да станат среќни и успешни луѓе – пишува Мајкл Гроус на својот блог „Перентинг ајдиас“.
Самосвест
Малите деца немаат социјални филтри. Во најлош можен момент ќе дадат коментари кои сигурно ќе ве усрамат пред сосед или роднина. Непријатните коментари можат да бидат слатки кога ги кажуваат многу мали деца, но ја губат својата привлечност кога тие коментари ги даваат деца на училишна возраст. Родителите можат да поттикнат самосвест со привлекување на вниманието на децата на барањата на различни социјални ситуации, менување на нивните социјални искуства и одржување високи очекувања во однесувањето. Процесот на социјализација значи дека децата мора да бидат свесни за тоа како нивните зборови и постапки влијаат врз другите и соодветно да го променат своето однесување.
Саморегулација
Свесноста на детето за неговиот емотивен свет е прекрасен подарок, но малку деца имаат способност да ги регулираат емоциите како што се анксиозноста, тагата и гневот. Да бидете способни да ги идентификувате вашите чувства или барем да имате чувство на свесност дека нешто не е во ред е неопходно за развој на емоционалната интелигенција и услов за емпатија.
Самоспознание
Родителите можат да ја промовираат самосвесноста на децата помагајќи им да ги идентификуваат нивните силни страни, охрабрувајќи широк спектар на интереси и обезбедувајќи им предизвикувачки можности во текот на последните години од основното образование и во текот на средното училиште.
Самодисциплина
Дали вашето дете може да седне на трпезариска маса со храната пред него и да чека додека сите не седнат пред да почне да јаде? Се надевам дека е така бидејќи малите жртви како оваа ја поттикнуваат самодисциплината неопходна за подоцнежниот успех. Способноста да се одложи моменталното задоволство е важна за подоцнежниот успех и е потребна во секој аспект од животот.
Самодисциплината, како мускул, треба да се вежба. Во спротивно ќе се намали. Родителите можат да развијат самодисциплина кај своите деца со охрабрување на мали акции со одложено задоволство, како што е заштеда на џепарлак. Помогнете им да разберат дека некои посакувани резултати, како што се добивање добри оценки, освојување спортски награди и помагање на другите, генерално бараат од нив да се откажат од нешто за возврат.
Самоуправување
Семето на вистински лидер се сее во детството од родители кои ги учат децата на цврсти вредности како што се почит, одговорност, добрина и емпатија. Тие поттикнуваат вештини како што се емоционална интелигенција, јасна артикулација и развој на независност. Самоуправувањето на многу начини е збир на овие особини. Она што е важно е да се развие успешен лидер во јавна смисла, како што е водење училишна група, спортски тим, група вработени на работното место или семејство.
912