Прашањата до психолозите и психотерапевтите може да ги испраќате на е-пошта: prasajpsiholog@deca.mk. Ве молиме прашањата пишувајте ги на кирилица. Нашето мото е: Кој прашува, дејствува! Кој си молчи, претпоставува!

ПРАШАЊЕ: Син ми има 2 години и 8 месеци. Дома зборуваме на македонски, често гледа цртани на туѓ јазик, а веќе 2 месеци оди во градинка каде што се зборува на трет јазик. На македонски се разбираме, но кажува само по еден збор, на пример, вода, леб, долу, палто, патики, капа… не сврзува поголеми реченици. Има ли простор за збунетост и страв?

ОДГОВОР: Детето на оваа возраст кое паралелно е изложено на два јазика или таканаречено билингвално дете е дете каде што времето за учење на јазикот му е поделено помеѓу јазиците, па така, не е изненадувачки што овие деца имаат посиромашен вокабулар и во двата јазика што ги зборуваат. Во однос на говорно-јазичната способност кај вашето дете, најнапред треба да востановиме на кој јазик во однос на слушање и учење од екран бил изложен и колку интензивно временски се случувало тоа. Потоа треба да земеме предвид дека билингвалноста кај него започнува од пред два месеца, што во случајот значи детето е еднакво изложено на двата јазика истовремено.

Ве советувам најнапред да го исфрлите од употреба и можност за учење третиот јазик на кој е изложен преку екран. Кога детето е изложено на ран билингвализам во земја во која не се зборува на негов мајчин јазик, се препорачува најнапред да се усвојува јазикот на кој ќе продолжи со образованието понатаму. Бидејќи детето е сѐ уште во процес на адаптација кон нова јазична средина, најнапред треба да му дадете време и стрпливост во комуникацијата, со што би го следеле неговиот јазичен тек, а потоа би можел едниот родител секогаш да зборува со него на мајчиниот јазик, а другиот родител на секундарниот јазик, со што детето ќе прави диференцијација на јазиците, но и се зголемува неговата јазична флуентност и флексибилност.

Одговара: Христина Стефановска, психолог за деца и адолесценти, Здружение „Хармоничен свет“, е-пошта: hristina_psihologija@yahoo.com

Психолозите и психотерапевтите ги одговараат прашањата според редоследот на нивното испраќање, а одговорите ќе се објавуваат на Деца.мк. Одговорите имаат психоедукативна функција и ги насочуваат родителите кон посеопфатни насоки на решавање на состојбата што ги мачи. Се разбира, покомплексните прашања подразбираат покомплексен пристап.

Рубриката „Прашај психолог“ овозможува стручна поддршка од психолози и психотерапевти на родителите при справување и решавање одредени актуелни прашања од психолошка природа на нивните деца и е резултат на соработка помеѓу Деца.мк и „Психотерапика“ – здружение за психологија и психотерапија. На прашањата одговараат психолози и психотерапевти, членови и соработници на здружението, како и самостојни експерти, соработници на Деца.мк.