До кој месец од бременоста е дозволено да се плива во море, како да се справиме со летните горештини, какво однесување треба да избегнуваат трудниците на море, дали има реални пречки за пливање во море во третиот триместар од бременоста… се само дел од прашањата што ги мачат идните мајки.

Некои велат дека трудниците не треба да пливаат во море, но сепак пливањето се препорачува како најдобра активност за трудниците. Дали има некои правила што треба да ги почитуваат при капење, на пример, температурата на водата, колку долго може да се остане во вода, колку време пред закажаниот термин е дозволено капење и слично.

Гинекологот д-р Сенка Саболовиќ Рудман и д-р Ула Мартон објаснуваат дали на трудниците им е дозволено да пливаат во море и во базен.

Дали бремените жени смеат да пливаат во море?

Пливањето во чисто море е дозволено доколку наодите и статусот на бременоста се нормални, односно нема дијагноза за закана за спонтан абортус или предвремено породување. Тоа е здрава и корисна активност која се препорачува без разлика во кој месец од бременоста сте.

Трудниците треба да внимаваат морето да не е премногу студено за да не доживеат температурен шок. Освен тоа, треба да внимаваат и да носат удобни чевли за случајно да не се лизнат.

И гинекологот д-р Ула Мартон вели дека трудниците не треба да го избегнуваат летниот одмор на море.

– Доколку се работи за нормален тек на бременоста, тоа значи дека трудницата нема висок крвен притисок, нерегулиран дијабетес, нерегулирана хормонална функција на тироидната жлезда, бубрежни заболувања и/или срцеви заболувања, доколку не постои сомнеж за ниско плацентарно ниво или можност за предвремено раѓање или каква било опасност за бебето, трудниците можат да патуваат.

Сепак, при патувањето до дестинацијата идната мајка треба да се приспособи на своите физички можности, постојано слушајќи го своето тело.

Патувањето со кое било транспортно возило бара одмор на секои 1,5 до 2 часа со лесно истегнување, одење и освежување – препорачува д-р Мартон.

Дали бремените жени смеат да пливаат во базен?

Што се однесува до базените, тие се под знак прашалник поради чистотата на водата и личната хигиена на другите луѓе. Пливањето во базен кој го користат голем број луѓе генерално не им се препорачува на жените бидејќи гениталните инфекции се многу чести. Идеални се базените каде што водата е беспрекорно чиста и не ги користат многу луѓе. Значи, иако умерената физичка активност во вода е добра за трудницата, не треба да практикувате премногу често пливање во базен.

Пливањето во море е многу поприфатливо од пливањето во базени и бањи. Поради температурни разлики, се препорачува да се избегнуваат турски бањи, влажни и суви сауни. Од хигиенски причини се препорачува избегнување џакузи, советува гинекологот.

Она на што дефинитивно треба да внимаваат идните мајки, напоменува д-р Мартон, е да ги менуваат водените костими за капење за да го спречат воспалението на мочниот меур, кое е многу почесто за време на бременоста.

Доколку сепак одлучите да пливате во базен, придржувајте се до следниве правила: не останувајте долго во водата во базенот, истуширајте се по капењето и сменете го костимот за капење веднаш по излегувањето од базенот.

Избегнувајте прекумерно изложување на сонце

Топлината и изложувањето на сонце нема да му наштетат на бебето, туку на трудницата. Штетноста на УВ-зраците, можноста за изгореници и дехидрација се причини да се остане под сенка од 10 до 16 часот.

Генерално, гинеколозите препорачуваат избегнување прекумерно изложување на сонце кое може да предизвика изгореници, сончаница со треска и дехидрација со пад на нивото на електролити, што може сериозно да ја загрози мајката, но и бременоста.

Извор