Гадење, повраќање, запек и проширени вени се вообичаени непријатности за време на бременоста кои влијаат врз речиси секој дел од телото, вклучувајќи ги и забите.

Кога станува збор за бременоста и забите, една студија покажала дека верувањата за губење на забите во бременоста се распространети низ културите. Но, дали бременоста може да предизвика паѓање на забите?

Бременоста и забите – митови и факти

Д-р Дмитриј Малаев, стоматолог од Њујорк, објаснува дека хормоналните промени за време на бременоста влијаат врз непцата, а не врз забите и не предизвикуваат директно губење на забите. Ако забите навистина паѓаат за време на бременоста, веројатно се работи за други состојби.

Д-р Елизабет Лаборд, педијатриски стоматолог од Тексас, нагласува дека бременоста сама по себе не води до сериозен кариес или потреба од забни протези.

На кариесот му требаат години за значително да напредува, често 4-6 години да навлезе во глеѓта и 1-2 да го оштети внатрешниот слој на дентинот.

Вообичаени причини за губење или расипување на забите се лоша орална хигиена, нездрава исхрана, пушење, употреба на дрога, нетретирани стоматолошки заболувања, ретки посети на стоматолог и физичка траума.

Проблеми со оралното здравје во бременоста

ЦДЦ известува дека 60-75% од бремените жени доживуваат гингивитис, каде што хормоналните промени предизвикуваат воспаление на непцата, што доведува до крвавење, црвенило и оток. Ако не се лекува, гингивитисот може да ескалира до инфекција на непцата и да го зголеми ризикот од губење на забите.

Исто така, високото ниво на прогестерон и естроген може привремено да ги олабави ткивата и коските кои ги држат забите на место, но тоа не води до губење на забите.

Како да ги зачувате забите за време на бременоста?

Американската стоматолошка асоцијација (АДА) нагласува дека бременоста може да го зголеми ризикот од кариес (расипување на забите за време на бременоста), не поради самата бременост, туку поради утринската мачнина и промените во исхраната, кои ја зголемуваат киселоста во устата и ја оштетуваат глеѓта.

Д-р Лиза Кривен советува да ја исплакнете устата со флуорирана вода веднаш по повраќањето за да ја заштитите глеѓта. Јадењето или џвакањето мраз доцна навечер, исто така, го зголемува ризикот од расипување на забите.

Д-р Мелин Чуанг ја нагласува важноста од посета на стоматолог за време на бременоста бидејќи многу жени во репродуктивна возраст имаат неоткриено расипување на забите.

Иако бременоста директно не предизвикува губење на забите, одржувањето добра орална хигиена е од витално значење. АДА препорачува урамнотежена исхрана, миење со паста за заби со флуор два пати на ден и секојдневно чистење со конец.

Редовните посети на стоматолог помагаат да се спречат проблемите, на пример гингивитис, да се претворат во посериозна пародонтална болест.

Автор: Томислав Станиќ

Извор