Денешните родители се свесни за важноста на менталното здравје и нарушувањата кои се однесуваат на сликата за сопственото тело. Но, експертите предупредуваат дека помалку познат проблем е во пораст, особено кај момчињата – бигорексија или мускулна дисморфија.

-Бигорексијата е психолошка состојба и вид телесно дисморфично нарушување што вклучува искривена слика за себе која конкретно се фокусира на големината на мускулите и физичкиот изглед – изјавила Кара Бекер, терапевт за нарушувања во исхраната.

Луѓето што страдаат од бигорексија се опседнати со зголемување на мускулната маса и преокупирани се со идејата дека нивното тело не е доволно силно.

-Поединците може да имаат искривена слика за телото, честопати верувајќи дека се помали или недоволно мускулести – вели Ејми Гудинг, клинички психолог во Центарот за обновување на исхраната во Балтимор.

Опсесивно вежбање и промени во исхраната

-Ова верување и преокупација може да доведат до нездраво однесување, вклучително и опсесивно вежбање, а исто така може да доведат до промени во навиките за јадење за да бидат што е можно послаби – додава Гудинг.

Иако мускулната дисморфија може да влијае врз секого, таа е почеста кај мажите, а истражувањата покажуваат дека нарушувањето е во пораст. Студија од 2019 година покажала дека 22% од момчињата се занимаваат со искривено однесување во исхраната насочено кон раст на мускулите. Не само тоа, студијата покажала дека додатоците во исхраната, промените во исхраната, па дури и употребата на стероиди се вообичаени кај младите возрасни мажи.

-Нарушувањата во исхраната кај момчињата честопати се недоволно препознаени и недоволно дијагностицирани – вели Џејсон Нагата, педијатар специјализиран за нарушувања во исхраната кај момчињата и мажите.

Тој истакнал дека една неодамнешна канадска студија покажала оти хоспитализацијата поради нарушувања во исхраната кај машките пациенти драстично се зголемила од 2002 година.

-Недостигот на свест за нарушувањето може да доведе до тоа нарушувањето да се пропушти кај некој што се бори со него, бидејќи тоа е едно од најмалку познатите нарушувања. Оние што се борат може да се двоумат да побараат помош поради срам, тајност или нормализирање на однесувањето во заедницата – посочува Гудинг.

Социјалните мрежи придонесуваат за зголемување на бигорексијата кај децата и младите

Постојат многу потенцијални причини и влијанија, вклучувајќи биолошки, психолошки и социо-културни фактори, кои можат да придонесат за развојот на ова нарушување. Семејната историја на ментална болест, особено нарушувања поврзани со сликата на телото или анксиозноста, може да ја зголеми веројатноста за развој на бигорексија.

Траумата и злоупотребата исто така, се потенцијални фактори на ризик за бигорексија.

-Бодибилдерите и оние што креваат тегови се изложени на поголем ризик од општата популација. Спортистите што креваат тегови за да го променат својот изглед се изложени на поголем ризик од оние што се фокусирани на подобрување на перформансите – вели Нагата.

Експертите се согласиле дека социјалните медиуми се еден од најголемите фактори што придонесуваат за порастот на бигорексијата.

Преголемиот акцент на медиумите на идеализираниот физички изглед е особено штетен за помладите момчиња, кои можеби не разбираат целосно дека влијателните луѓе и познатите личности живеат од сликите на нивните тела. Тоа е уште една реалност која е недостапна за повеќето луѓе.

– Тиктокерите и другите инфлуенсери на социјалните медиуми заработуваат милиони долари преку лајкови и следбеници, а потоа инвестираат во професионални тренери, готвачи со полно работно време и други експерти за да го негуваат и одржуваат својот имиџ – вели Џозеф Џеј Трунзо, професор по психологија и вонреден декан на Факултетот за здравје и бихевиорални науки при Универзитетот „Брајант“, Род Ајленд.

-Инфлуенсерите можат да направат илјадници фотографии и да ја изберат најдобрата, со најдобро осветлување или поза, за да создадат идеализирана верзија за себе. Ништо од тоа не е реално. Накратко, ние постојано сме изложени на нереални, идеализирани и гламурозни верзии на човечкото тело, со брзина каква што досега не сме доживеале. Во рацете на млада, впечатлива личност, ова е многу опасна психолошка катастрофа и додадена опасна психолошка рецептура – додава тој.

Што можат да направат родителите?

Постојат многу начини на кои родителите можат да помогнат во борбата против проблемите и нарушувањата поврзани со сопствената слика за телото, како што е бигорексијата.

-Ограничете ја употребата на социјалните мрежи што е можно повеќе, но разберете дека не можете целосно да ја елиминирате. Вашето дете ќе биде изложено на овие слики, затоа разговарајте со него за она што го гледа. Слушајте што вели, како го толкува она што го гледа, уверете се дека ја разбира реалноста – велат експертите.

Препорачуваат да се истакнат човечките вредности кои го надминуваат физичкиот изглед. Фокусирајте се на квалитети како љубезност, креативност, хумор итн.

Обрнете внимание на коментарите што ги давате за сопственото тело пред вашите деца и на ставовите што ги покажувате кон вежбањето и храната. Внимавајте на видовите пораки што вашите деца ги добиваат од активностите на социјалните мрежи.

Ако родителите веруваат дека нивното дете е малтретирано или задевано поради изгледот, треба да преземат акција.

-Раната интервенција и третман се клучни за запирање на прогресијата на мускулната дисморфија. Ако родителот препознае однесување што може да предизвика загриженост кај нивното дете, треба да разговара за процесот на размислување – вели Гудинг.

Нагата споделува неколку типични предупредувачки знаци за мускулна дисморфија, повикувајќи ги родителите да обрнат внимание доколку нивното дете развие преокупација или опсесија со тежина, храна, вежбање или изглед, на начин што го влошува квалитетот на нивниот живот и го нарушува нивното секојдневно функционирање.

-На пример, некои момчиња ги поминуваат сите будни часови вежбајќи и се чувствуваат виновни ако не се во сала. Тие можеби повеќе нема да јадат со своите семејства или со пријатели поради загриженоста за нивната исхрана – потенцира Нагата.

Ако се сомневате дека вашето дете почнува да се бори со бигорексија, задолжително побарајте стручна помош.

Автор: Ана Дукиќ

Извор