Прашањата до психолозите и психотерапевтите може да ги испраќате на е-пошта: prasajpsiholog@deca.mk. Ве молиме прашањата пишувајте ги на кирилица. Нашето мото е: Кој прашува, дејствува! Кој си молчи, претпоставува!

ПРАШАЊЕ: Сакам да ве прашам дали гледањето цртани навистина влијае врз развојот на говорот? Мојот син има една година и седум месеци и кажува мама, баба, тебе и други зборови на негов јазик, но кога одам на работа, баба му му пушта цртани. Тој си игра со играчките и си гледа. Кога сум дома, гледам повеќе да шетаме и да играме. Ме загрижува дали цртаните ќе му влијаат врз развојот. Не знам како да постапам.

ОДГОВОР: Најголемите мозочни региони кои припаѓаат во првиот дел од развојот на детето се ротацијата, рамнотежата, развивање на нозете, динамичната акомодација на окото, фината моторика и говорот бидејќи имаат најголем број синапси.

Технологијата директно влијае врз сите овие процеси, со што се губи динамичната акомодација на детето особено ако детето учи во присуство на технологијата да изведува други активности како играње, хранење, пресоблекување итн.

На оваа возраст детето воопшто не треба да биде изложено на екран. Неговото секојдневие треба да се состои од прошетка или игра во дворот без разлика на временските услови. Другите активности во домот се во насока на тренирање ритам преку музика и имитација на познати движења, разгледување и листање сликовници, играње со пластични чинии и чаши, сензорни шишиња итн.

Одговара: Христина Стефановска, психолог за деца и адолесценти, Здружение „Хармоничен свет“, е-пошта: hristina_psihologija@yahoo.com

Психолозите и психотерапевтите ги одговараат прашањата според редоследот на нивното испраќање, а одговорите ќе се објавуваат на Деца.мк. Одговорите имаат психоедукативна функција и ги насочуваат родителите кон посеопфатни насоки на решавање на состојбата што ги мачи. Се разбира, покомплексните прашања подразбираат покомплексен пристап.

Рубриката „Прашај психолог“ овозможува стручна поддршка од психолози и психотерапевти на родителите при справување и решавање одредени актуелни прашања од психолошка природа на нивните деца и е резултат на соработка помеѓу Деца.мк и „Психотерапика“ – здружение за психологија и психотерапија. На прашањата одговараат психолози и психотерапевти, членови и соработници на здружението, како и самостојни експерти, соработници на Деца.мк.