СЗО во последните месеци постојано алармира за опасност од „апсолутна катастрофа“ доколку не се прекине одложувањето на вакцинацијата на децата поради пандемијата и ако пребрзо се укинат здравствените ограничувања.

Бројот на случаи на мали сипаници скокнал за 79 отсто во првите два месеца од 2022 година, во споредба со истиот период минатата година, според СЗО и УНИЦЕФ.

Двете агенции на ОН сега стравуваат од сериозни епидемии на сипаници, многу заразна вирусна болест која може да погоди милиони деца оваа година.

Светот пријави 17.338 случаи на сипаници во јануари и во февруари, додека имаше 9.665 во првите два месеца од 2021 година. Но, бројките се веројатно поголеми бидејќи пандемијата ги наруши системите за надзор.

Најдобрата заштита од морбили е високата покриеност со вакцинација.

Во последните 12 месеци – до април, забележани се 21 значајна епидемија на морбили, главно во Африка и регионот на Источниот Медитеран.

Земјите што забележаа најголеми епидемии на морбили од минатата година се Сомалија, Јемен, Нигерија, Авганистан и Етиопија.

Бидејќи овие сипаници се многу заразни, случаите се јавуваат кога нивото на вакцинација опаѓа. Двете агенции на ОН стравуваат дека епидемиите на сипаници се знак за појава на други болести кои побавно се шират.

Во 2020 година 23 милиони деца во светот не примиле основни вакцини, што е најголем број од 2009 година и за 3,7 милиони повеќе отколку во 2019 година, според СЗО и УНИЦЕФ.

– Пандемијата на ковид-19 ја наруши имунизацијата, здравствените системи се преоптоварени и сега гледаме повторна појава на смртоносни болести, вклучително и сипаници. За многу други болести, влијанието на нарушувањата на вакцинацијата ќе се чувствува со децении – предупредува шефот на кабинетот на СЗО, Тедрос Адан Гебрејесус.

– Сега е време да се вратат основните програми за имунизација на вистинскиот пат и да се започнат кампањи за компензација за секој да има пристап до вакцини за спасување животи – повика тој.

Ризикот од големи епидемии расте бидејќи земјите ги ублажуваат превентивните мерки преземени во борбата против ковид-19, како што е почитувањето на физичката дистанца.

– Охрабрувачки е да се види дека луѓето во многу заедници почнуваат да се чувствуваат доволно заштитени од ковид-19 за да продолжат со повеќе социјални активности. Но, во земјите каде што децата не примаат рутински вакцини, тоа создава услови совршени за ширење болести, како што се сипаниците – предупреди директорката на УНИЦЕФ, Кетрин Расел.

Егзодусот на милиони луѓе поради конфликтите и кризите во Украина, Етиопија, Сомалија и Авганистан, меѓу другото, го зголемува и ризикот од епидемии кај и онака многу ослабеното население.

Извор