Сите родители знаат дека со доаѓањето на бебето може да очекуваат замор и несоница, особено во првите месеци, кога детето почесто се буди навечер за да јаде. Иако оваа фаза на лишување од сон за родителите е сосема нормална и очекувана, на долг рок е многу исцрпувачка.

Истражувањата покажуваат дека новите родители губат значителен број часови сон секоја вечер, а во некои случаи тоа може да продолжи додека детето не наполни шест години. Добрата вест е дека постојат стратегии кои можете да ги користите за да ви помогнат да бидете барем малку поодморени.

Важноста на спиењето

Спиењето игра многу важна улога во нашата способност да размислуваме јасно. За време на РЕМ-фазата на спиење, мозокот ги подредува спомените и ги обработува дневните настани, а недостигот на оваа фаза на спиење може да влијае врз меморијата. Едноставно кажано, ако не спиете доволно, ќе се запрашате дали сте направиле нешто или не.

Ова може да резултира со нетрпение кон вашето бебе, чести промени во расположението и зголемен ризик од несреќи – недостигот на сон го забавува вашето време на реакција, што може да ги направи активностите како возење и вежбање небезбедни.

Недостигот на сон има негативно влијание врз менталниот систем, како и врз тежината, бидејќи може да доведе до хормонални нарушувања.

Како да се одморите со мало бебе дома

Не очекувајте да бидете одморени со мало бебе како што бевте претходно, но обидете се да го ублажите заморот со некои од следниве стратегии:

Надополнете го изгубениот сон – кога личноста која долго време е лишена од сон конечно ќе поспие малку, мозокот ќе воспостави и длабок и РЕМ-сон, што значи дека секој момент на спиење, без разлика дали трае неколку часа или неколку минути, значи многу повеќе од неспиење.

Побарајте помош и влезете во ритамот на вашето бебе – на почетокот ќе имате доволно сила да ги поминете деновите и покрај недостигот на сон, но тоа не можете да го правите засекогаш. Кога вашето тело ќе се измори, ќе мора да најдете решение, а тоа може да биде барање помош од некој ваш близок да го чува бебето, или да спиете и вие кога спие бебето.

Споделете ги обврските за ноќно хранење – ако вашето бебе се храни со адаптирано млеко, обидете се да креирате распоред со вашиот партнер за да го храните детето наизменично.

Не реагирајте на секој шум – бебињата минуваат низ различни фази на спиење и често се немирни, затоа обидете се да не скокате од кревет при секој шум од креветчето на вашето бебе. Научете го вашето бебе да се смири или повторно да заспие самостојно, а тоа ќе го направите така што нема да го земете в раце веднаш кога ќе заплаче. Се разбира, ова не значи дека треба да го оставите вашето дете да плаче долго време, туку дајте му малку време за да видите дали може да се смири самостојно.

Водете здрав начин на живот – бидејќи не можете да спиете цела ноќ без да се разбудите поради бебето, обидете се да ја надополните вашата енергија со здрава исхрана и многу течности.

За крај, бидете свесни дека нема магично решение за заморот, но обидете се да се грижите за себе бидејќи само така можете соодветно да се грижите за вашето бебе.

Автор: Наташа Златковиќ

Извор