Кога родителите ќе забележат дека нивното дете не ги гледа луѓето в очи додека комуницира со нив, некои не му придаваат значење на тоа, додека други веднаш мислат дека е аутизам. Избегнувањето контакт со очите навистина може да биде знак за развоен проблем, но не треба да избрзуваме со заклучоци, туку треба внимателно да го анализираме однесувањето на малото дете.

Логопедот и дефектолог Елена Мамуровна Мелникова објаснува кога треба родителите да побараат помош од специјалист.

Зошто детето избегнува контакт со очите?

Иако мајките и татковците обично се многу загрижени ако нивното дете не воспоставува контакт со очите, тоа не е нужно знак за аутизам. Аутизмот е развојно нарушување поради кое луѓето, во овој случај децата, имаат проблеми со социјалните интеракции и комуникација, имаат ограничен опсег на интереси, често вршат повторувачки дејства и избегнуваат визуелен и тактилен контакт. Овие симптоми се појавуваат пред тригодишна возраст.

Дали недостигот на контакт со очите кај децата секогаш треба да ве загрижува? Причината за ова може да биде:

Темпераментот на детето – некои мали деца се природно поповлечени и им треба подолго време за да воспостават емоционален контакт.
Возраст – во првите месеци од животот, бебињата само учат да го фокусираат погледот и да го следат лицето на возрасен човек.
Здравствени состојби – проблеми со видот, проблеми со слухот и многу вирусни заболувања можат да влијаат врз способноста на детето да оствари контакт со очите.

Понекогаш причината може да биде тоа што детето е немирно, трча низ собата и се препушта на својата игра, па нема време да ве погледне в очи. Сето ова не значи дека нешто не е во ред со детето, вели Мамуровна Мелникова. Децата на возраст од две или три години се многу активни и импулсивни и како што растат и се развиваат, учат подобро да го контролираат своето однесување и да обрнуваат повеќе внимание на другите.

Друга можна причина за недостигот на контакт со очите, според експертот, е погрешното однесување на возрасните. На пример, ако зборувате со дете додека стоите, вие сте многу повисоки од него и тешко му е да оствари контакт со очите. Наместо тоа, за да воспоставите емотивен контакт, седнете до детето, физички спуштете се на неговото ниво. Ова ќе создаде многу попријатна атмосфера за разговор и ќе создаде можност полесно да воспоставите контакт со очите.

Сепак, советот на логопедот е дека доколку забележите оти вашето дете не остварува контакт со очите, дефинитивно побарајте помош од специјалист за да ја утврдите точната причина.

Таа понатаму објаснува дека ако едно и полгодишно дете не воспоставува контакт со очите кога му зборувате, тоа не треба да се игнорира, бидејќи може да укаже на развоен проблем. Доколку забележите такво однесување кај тригодишно дете, треба без одлагање да се јавите кај специјалист бидејќи доцнењето може да создаде дополнителни, понекогаш и непоправливи последици во говорот, комуникацијата и социјалниот развој на детето.

Автор: Наташа Златковиќ

Извор