Надарените деца, ученици и млади од здружението „Дар“ од Загреб изработиле „Манифест за подобар свет“ – збирка на идеи што ја нагласува потребата од препознавање и поддршка на надарените деца, чие знаење и вештини можат да ги подобрат економијата, културата, здравството и другите сектори, правејќи го општеството поконкурентно и иновативно.

Тоа е документ дизајниран да помогне да се создаде подобра средина за надарените деца и младите, со поттик за развивање на нивните таленти, што во голема мера може да помогне за напредокот на општеството како целина. Манифестот ги обединува инспиративните детски идеи за тоа каква иднина сакаат да создадат. Водени од желбата за еднаквост, иновации и грижа за животната средина, резултатот е јасна визија за свет каде што владее разбирањето, креативноста и одговорноста. Така, децата истакнале дека правата се важен темел на општеството и дека нивниот глас мора да биде посилен.

-Понекогаш мораме да бидеме упорни, дури и досадни, за да го добиеме она што го сакаме – велат тие, нагласувајќи ја важноста од борбата за еднаквост и правото на образование, што ги стимулира нивните интереси и таленти.

Надарените деца сонуваат за училишта за јазици, наука или уметност

Нивниот идеален свет е зелен, без пластика и отпад, со чисти реки и шуми полни со живот. Тие замислиле систем на „линии за отпад“ – корпи за отпад поврзани со цевки, кои автоматски го транспортираат отпадот до соларни и водни печки за согорување. Децата дури предложиле хидроцентрали кои користат бранова енергија без да му наштетат на морскиот живот.

Во нивниот свет технологијата ја игра улогата на помошник, а не господар. Роботите би им помагале на наставниците да носат книги и тие никогаш не треба да им викаат на децата. Тие сонуваат за училишта со иновативни алатки како „шлемови за учење“ кои го забрзуваат процесот на стекнување знаење.

Училиштата што децата ги замислуваат би биле приспособени на нивните интереси – училишта за јазици, наука или уметност. Предметите што ги сакаат би биле подлабоко проучувани, додека помалку потребните содржини би станале минато. Децата дури би ги избрале своите наставници откако ќе поминат неколку дена со нив, бидејќи веруваат дека врската со наставниците е клучна за квалитетно образование.

Тие, исто така, ја истакнале важноста од меѓусебната љубезност и поддршка:

-Кога некој нема ужина, можеме да ја споделиме. Ако некој е тажен, треба да го прашаме како е, како што ја прашувам мајка ми кога е уморна – вели едно од децата.

Тие веруваат дека различноста на луѓето ја збогатува заедницата затоа што секогаш можеме да учиме едни од други.

Нивната визија ги надминува локалните граници. Тие предложиле глобални платформи за соработка, иновации кои им помагаат на луѓето и животните и технологии кои го намалуваат еколошкиот отпечаток. Идеите како згради со чиста енергија и „копче за решавање проблеми“ покажуваат колку нивните предлози се насочени кон создавање подобар свет за секого.

„70 проценти од училиштата немаат психолози за да ги препознаат и поддржат надарените деца“

Здружението „Дар“ континуирано работи на препознавање и поддршка на младите таленти од своето основање во 2015 година. Нивните проекти, како што се пилот програмите во четири основни училишта, покажале колку е важно да се развие средина за поддршка за надарените.

-Ваквите програми поттикнуваат креативност и решавање сложени задачи, односно развиваат клучни вештини за иднината. Во Хрватска имаме речиси 10.000 надарени деца и ученици, кои воодушевуваат со своите исклучителни таленти и достигнувања – од основци со знаење на ниво на факултет, до четвртоодделенци со ИТ-вештини кои ги надминуваат постарите. Меѓу нив има млади иноватори, кои самостојно развиваат бази на податоци и оперативни системи. Но, загрижувачко е тоа што 70 проценти од училиштата немаат психолози за да ги идентификуваат и поддржат надарените деца, што јасно покажува колку е важно систематски да се инвестира во образованието и да се создадат услови во кои нивниот потенцијал може да процвета – истакнала Весна Озретиќ, потпретседател на здружението.

Извор