Дури и ако се чувствувате одлично по породувањето, вашето тело, кое поминало низ сериозни предизвици, мора да закрепне. Затоа е многу важно да не претерувате кога ќе почнете да вежбате. Морате внимателно да ги следите сите знаци што ви ги испраќа телото, а доколку почувствувате болка или непријатност, веднаш престанете.

Вежбите воведувајте ги постепено во консултација со вашиот лекар и најдобро е да ги изведувате во серии, првично со 5 повторувања, а подоцна со 10. Со текот на времето, како што мускулите се зајакнуваат и нивото на енергија се зголемува, зголемете го бројот на серии. Без разлика дали се работи за вежби за стомакот, грбот, нозете или карличните мускули, секогаш е подобро да ги изведувате правилно во помал број отколку повеќе неправилно изведени.

Болките во грбот, честото мокрење и лабавите зглобови можат да бидат пречка за вежбање, но тие не треба да ве спречат да се занимавате со активности кои се препорачуваат во овој период.

Вежбање по природно породување

Ден или два по породувањето можете да почнете да правите Кегелови вежби. Така ќе го намалите ризикот од уринарна инконтиненција, уринарен стрес, проблеми кои ги погодуваат дури 70 отсто од жените по бременоста. Овие вежби го негуваат мускулниот тонус на вагината, што е предуслов за подобро сексуално уживање.

Идеална вежба за самиот почеток по породувањето е прошетката, со бебето во количка. Како што стекнувате кондиција, постепено зголемувајте го времетраењето на прошетката и брзината со која се движите.

Вежбите на подлогата за зајакнување и контурирање на мускулите на стомакот, грбот, нозете и рацете не се премногу напорни, а се одлични за постигнување на посакуваниот ефект. Најдобри резултати се постигнуваат со секојдневна посветеност и постепено зголемување на времетраењето и интензитетот на вежбањето.

Не правете никакви вежби што вклучуваат истегнување најмалку 12 недели по породувањето.

Не се препорачуваат ниту вежби и физички активности кои претерано ги оптоваруваат зглобовите. За време на бременоста, вашето тело го лачи хормонот релаксин, кој значително ги омекнува зглобовите. Дури и по породувањето, останува во вашето тело најмалку 8 недели.

По првиот преглед (6-8 недели по породувањето), по консултација со лекар, можете да започнете со одбрани вежби за зајакнување на стомачните мускули.

Важно е да не се преоптоварувате, да ги следите сигналите што ги испраќа вашето тело и да престанете да вежбате во секое време доколку чувствувате болка.

Вежбање по царски рез

Царскиот рез е сериозна операција и минималното закрепнување трае најмалку 6 недели. Сепак, во првата недела по породувањето можете да започнете со вежби за зајакнување на карличните мускули (Кегелови вежби).

По првиот преглед можете да започнете со лесни прошетки и вежби за стомачните мускули доколку тоа го одобрил вашиот лекар.

Можете да ги вежбате стомачните мускули така што сами ќе ги затегнувате и ќе ги опуштате по 10 секунди. Сето ова го правите додека седите во исправена положба со затегнат грб. На овој начин безбедно ќе го вратите абдоминалниот тонус, без преголем напор.

Избегнувајте стомачни и какви било други вежби кои можат да извршат притисок врз лузната. Не кревајте ништо тешко.

Пешачењето е најдобрата активност во овој период, без џогирање, каков било вид трчање или што било друго што би им претставувало преголем стрес на зглобовите.

Не правете тешки и сериозни вежби додека не поминат најмалку 3-4 месеци по царскиот рез.

Извор