Прашањата до психолозите и психотерапевтите може да ги испраќате на е-пошта: prasajpsiholog@deca.mk. Ве молиме прашањата пишувајте ги на кирилица. Нашето мото е: Кој прашува, дејствува! Кој си молчи, претпоставува!

ПРАШАЊЕ: Внука ми има 15 години и не сака да се дружи со никого, нема ниту една другарка. По цел ден лежи в соба и мисли дека не е убава и дека сите ја мразат. Во школо, исто така, не зборува со ниту еден ученик. Пред две години го изгуби таткото. Ве молам за совет.

ОДГОВОР: Ја разбирам вашата загриженост и жалам за вашата семејна загуба. На возраста во која е вашата внука, во периодот на пубертетот, децата се соочуваат со интензивни емоции, сликата за себе е нарушена, самодовербата паѓа и стануваат многу зависни од тоа што мислат нивните врсници. Поради тоа, често се чувствуваат осамени, изгубени се и се повлекуваат.

Потрудете се да поразговарате за тоа како се чувствува, од каде идејата дека ја мразат, дали имала некои лоши искуства во училиште? Негативните искуства можеби ја спречуваат да воспостави врска бидејќи се плаши од можно отфрлање. Како се однесува со блиската фамилија, какви односи има развиено?

Од друга страна, она што можете да го направите е да го поттикнете развојот на нејзината самодоверба, да ја слушате, да ја пофалите, да ги покажете вашите чувства, да ја насочите кон позитивното. Повикувајте ја да ви помага во некои домашни обврски и мали задачи, по што ќе почувствува задоволство од работата. Покажете интерес за нејзините интереси, што сака да чита, гледа, кој предмет во училиште ѝ е омилен итн.
Охрабрете ја сама да направи чекори кон приближување кон другите деца. Советувајте ја да се запише на некоја активност, нешто во што навистина ужива. Споделете ваши чувства кога сте биле на нејзина возраст и за вредностите што ги имаме во себе.

Мој совет би бил да разговарате со вашата внука и да видите дали таа би сакала да види професионалец кој е непристрасен и може да ѝ помогне да се чувствува подобро, со кој ќе работи на прифаќање на себеси. Бидејќи кога ќе почнеме да се сакаме себеси, тогаш не зависиме од одобрувањето на другите, тогаш ги избираме луѓето што ни одговараат.

Доколку имате потреба од разговор и дополнителна помош за развојот на вашата внука, потребно е да закажете родителско советување и психоедукација на sovetuvanje@gmail.com

Одговара: Билјана Манасова-Јовановиќ, дефектолог и психотерапевт; Психотерапија и советување 
е-пошта: sovetuvanje@gmail.com

Психолозите и психотерапевтите ги одговараат прашањата според редоследот на нивното испраќање, а одговорите ќе се објавуваат на Деца.мк. Одговорите имаат психоедукативна функција и ги насочуваат родителите кон посеопфатни насоки на решавање на состојбата што ги мачи. Се разбира, покомплексните прашања подразбираат покомплексен пристап.

Рубриката „Прашај психолог“ овозможува стручна поддршка од психолози и психотерапевти на родителите при справување и решавање одредени актуелни прашања од психолошка природа на нивните деца. На прашањата одговараат психолози и психотерапевти соработници на Деца.мк.