Прашањата до психолозите и психотерапевтите може да ги испраќате на е-пошта: prasajpsiholog@deca.mk. Ве молиме прашањата пишувајте ги на кирилица. Нашето мото е: Кој прашува, дејствува! Кој си молчи, претпоставува!

ПРАШАЊЕ: Ќерка ми има 2 години и има богат речник на англиски јазик, а на македонски послаб. Одговара на команди, се врти на име, игра со играчки. Весела е, знае да побара што сака. По совет од педијатар ги прекинавме сите екрани и ја поправаме кога кажува зборови на англиски, па ѝ ги кажуваме на македонски. Сега кога ќе побара цртан, јас ѝ кажувам дека не може, па почнува хистерично да писка и да плаче, фрла сѐ околу неа. Тоа трае 10 минути. Има помала сестричка, која има два месеца, и покажува љубомора кон неа. Како да постапам? Страв ми е да не се затвори во себе.

ОДГОВОР: Од вашиот исказ можам да разберам дека кај вас постои страв од емоционалноста на вашето дете до степен таа да се затвори во себе. Кога станува збор за емоциите, возрасните луѓе, како и децата, ги екстернализираат надвор од себе или ги интернализираат или потиснуваат во себе.

Дали детето ќе научи да ги искажува и канализира или, пак, ќе ги потиснува, зависи од пристапот на возрасните во врска со неговите емоции. Вашето дете има две години и за почеток треба да дозволите да биде емоционално и да ги манифестира своите емоции, па макар и непријатните, на непријатен и неприфатлив начин, без да се плашите од тоа.

На оваа возраст целта во емоционалната интелигенција кај едно дете не е да го научиме како да се справи со емоцијата, туку како да ја препознае и именува. Тоа најлесно се учи кога вие ги рефлектирате нејзините чувства како: „Гледам дека си многу лута, тажна, исплашена итн. Читајте сликовници каде што се претставени чувствата и поттикнувајте и охрабрувајте да именува што почувствувала.

Одговара: Христина Стефановска, психолог за деца и адолесценти, Здружение „Хармоничен свет“, е-пошта: hristina_psihologija@yahoo.com

Психолозите и психотерапевтите ги одговараат прашањата според редоследот на нивното испраќање, а одговорите ќе се објавуваат на Деца.мк. Одговорите имаат психоедукативна функција и ги насочуваат родителите кон посеопфатни насоки на решавање на состојбата што ги мачи. Се разбира, покомплексните прашања подразбираат покомплексен пристап.

Рубриката „Прашај психолог“ овозможува стручна поддршка од психолози и психотерапевти на родителите при справување и решавање одредени актуелни прашања од психолошка природа на нивните деца и е резултат на соработка помеѓу Деца.мк и „Психотерапика“ – здружение за психологија и психотерапија. На прашањата одговараат психолози и психотерапевти, членови и соработници на здружението, како и самостојни експерти, соработници на Деца.мк.