Прашањата до психолозите и психотерапевтите може да ги испраќате на е-пошта: prasajpsiholog@deca.mk. Ве молиме прашањата пишувајте ги на кирилица. Нашето мото е: Кој прашува, дејствува! Кој си молчи, претпоставува!

ПРАШАЊЕ: Мојот син има 5 години. Кога е дома, не го интересираат играчки, туку по цел ден е пред телевизор, а ако го изгаснам, ужасно плаче. На продавница не можам да го однесам зашто сѐ сака да купи. Кога сме надвор, не ме држи за рака, ми бега и секогаш прави сѐ што сака. Што да направам?

 ОДГОВОР: Вашето дете, кое е на петгодишна возраст, се соочува со проблем во следењето на правилата и почитувањето на границите на однесување. Многу е веројатно дека тој знае што е добро, а што лошо, но не може да го примени и согледа бидејќи не наидува на конзистентни и доследни правила. Сето тоа директно се манифестира врз дисциплината и детето учи преку предизвикувачко однесување да го привлекува вниманието на околината.

Со воведување правила во домот и посочување на границите на однесување што може, а што не може, потребно е да се воведат и последици од прекршените правила со ставање акцент и потенцирање на причинско-последичниот однос на случувањата. Во тој дел многу е важно и двајцата родители да сте истомисленици и конзистентни во регулирањето на границата, ако барем еден од вас не е доследен, однесувањето тешко може да се регулира. Исто така, за да ја регулираме дисциплината, потребно е и квалитетно да го негуваме поврзувањето со детето.

Секој од вас треба да има „еден на еден“ време во кое ќе спроведете некоја активност која понатаму ќе ја негувате и ќе стане ваша, на пример, со тато секогаш возам велосипед или се шетам во паркот, со мама секогаш играм игри како готвач, продавач, лекар итн. Поврзаноста е канал на инспирација и подлога за детето да ја вреднува вашата личност, а со тоа и вашите зборови и насоки кои му ги давате. Никогаш не заборавајте да го валидирате позитивното однесување „Гледам како убаво играш и зборуваш, навистина си прекрасно дете“. Пофалете го секој напредок, „Секој ден си сѐ подобар и подобар и јас сум горда на тоа“.

Одговара: Христина Стефановска, психолог за деца и адолесценти, Здружение „Хармоничен свет“, е-пошта: hristina_psihologija@yahoo.com

Психолозите и психотерапевтите ги одговараат прашањата според редоследот на нивното испраќање, а одговорите ќе се објавуваат на Деца.мк. Одговорите имаат психоедукативна функција и ги насочуваат родителите кон посеопфатни насоки на решавање на состојбата што ги мачи. Се разбира, покомплексните прашања подразбираат покомплексен пристап.

Рубриката „Прашај психолог“ овозможува стручна поддршка од психолози и психотерапевти на родителите при справување и решавање одредени актуелни прашања од психолошка природа на нивните деца. На прашањата одговараат психолози и психотерапевти соработници на Деца.мк.