Прашањата до психолозите и психотерапевтите може да ги испраќате на е-пошта: prasajpsiholog@deca.mk. Ве молиме прашањата пишувајте ги на кирилица. Нашето мото е: Кој прашува, дејствува! Кој си молчи, претпоставува!

ПРАШАЊЕ: Загрижена сум за мојот син кој има 11 години. Има голема одбивност кон учењето и кога е по негово, сѐ е добро додека не му споменам да учи и додека го почитувам неговото мислење (без разлика за што се работи). Кога не се согласувам со него, т.е. не попуштам, почнува да ми се спротивставува, да вика и плаче. Ве молам за совет.

ОДГОВОР: Од вашиот исказ можам да разберам дека кај вашето дете постои силна одбивност кон учењето и прифаќањето туѓи ставови, насоки и мислења. Дали тоа отсекогаш беше карактеристично за него? Присетете се каков пристап кон учењето разви уште во прво одделение.

Доколку од самиот почеток имал одбивност кон учењето и насоките од родителите, можеби се работи за отсуство на самодисциплина и почитување на правилата. Доколку, пак, одбивноста се јави подоцна, треба да се разгледа и утврди каде детето ја изгубило мотивираноста, можеби тоа биле превисоки критериуми и барања, психолошки притисок да се биде добар во сѐ, непрепознавање на интереси и афинитети, ниска самодоверба итн.
За таа цел, ве советувам директно да се обратите до стручно лице, детски психолог и психотерапевт со цел адресирање на причините за состојбата.

Одговара: Христина Стефановска, психолог за деца и адолесценти, Здружение „Хармоничен свет“, е-пошта: hristina_psihologija@yahoo.com

Психолозите и психотерапевтите ги одговараат прашањата според редоследот на нивното испраќање, а одговорите ќе се објавуваат на Деца.мк. Одговорите имаат психоедукативна функција и ги насочуваат родителите кон посеопфатни насоки на решавање на состојбата што ги мачи. Се разбира, покомплексните прашања подразбираат покомплексен пристап.

Рубриката „Прашај психолог“ овозможува стручна поддршка од психолози и психотерапевти на родителите при справување и решавање одредени актуелни прашања од психолошка природа на нивните деца и е резултат на соработка помеѓу Деца.мк и „Психотерапика“ – здружение за психологија и психотерапија. На прашањата одговараат психолози и психотерапевти, членови и соработници на здружението, како и самостојни експерти, соработници на Деца.мк.