Одложувањето на родителството може да има различни последици – и за родителите и за децата. Покрај фактот дека и жените и мажите можат да доживеат пад на плодноста со возраста, постарите родители може да имаат помалку енергија за секојдневните барања на децата. Постарите мајки, исто така, имаат поголем ризик од компликации за време на бременоста и породувањето, како што се гестациски дијабетес или хипертензија.

Децата на постарите родители може да се соочат со психолошки притисок ако нивните родители искусат здравствени проблеми или починат додека тие се мали.

Овие ризици не значат дека доцното родителство не може да биде исполнето или успешно, но важно е да се биде свесен за потенцијалните предизвици за да се донесат добри одлуки. Покрај сето ова, научниците неодамна откриле дека децата родени од постари татковци може да имаат поголем ризик од ментални болести и доцнење во развојот.

И мажите имаат биолошки часовник

Плодноста се намалува со возраста, а веројатноста дека децата ќе имаат аутизам, шизофренија и леукемија се зголемува со возраста на татковците.

Познато е дека одложувањето на татковството може да носи ризици за децата, но досега не се споменала возраста на татковците. Процесот за вештачко оплодување не се нуди на жени постари од 42 години, но не постои договорена дефиниција за тоа што значи „стари“ кога се во прашање татковците.

Иако има многу примери, особено неодамна, на стари, успешни и познати луѓе кои станале татковци на деца во подоцнежна возраст, истражувачите се фокусирале на тоа како возраста на мажот негативно влијае врз квалитетот на спермата. Голем систематски преглед објавен во 2015 година, кој анализирал 90 одделни студии во кои биле вклучени повеќе од 90.000 субјекти, покажал дека возраста на мажот негативно влијае врз изгледот на спермата, движењето и оштетувањето на истата.

Финансискиот стрес е најштетен за здравјето

Исто така, докажано е дека плодовите од постарите мажи имаат поголема веројатност да завршат со спонтан абортус или предвремено породување. Постарите татковци, исто така, имале поголема веројатност да имаат деца со вродени мани, како што е расцеп на усна или дупка на дијафрагмата, а шансите се зголемувале со секоја година од возраста на таткото.

Некои видови рак во детството стануваат почести како што стареат татковците. Студија на матичната книга на родени на речиси 2 милиони деца во Данска покажала дека инциденцата на одреден тип леукемија во детството се зголемува за 13 отсто на секои пет години од возраста на таткото. Ризикот од рак на мозокот и рак на дојка е исто така зголемен кај децата родени од постари татковци.

Ментални нарушувања кај деца од постари татковци

Има и невролошки последици од староста на таткото. Помеѓу децата на татковците кои биле постари од 40 години при нивното раѓање има речиси шест пати поголема инциденца на аутизам отколку кај оние чии татковци биле на возраст под 30 години, покажала една студија.

Бебињата родени од татковци постари од 50 години се соочуваат со петкратно зголемен ризик од шизофренија. Опсесивно-компулсивно нарушување, АДХД, биполарно растројство – сите се поверојатни, покажува истражувањето, ако таткото е постар.

На возраст од педесет години жената се соочува со целосно прекинување на нејзиниот репродуктивен капацитет. Ова не важи за мажите, кои се способни да се размножуваат до крајот на животот. Меѓутоа, истражувањата сега покажуваат дека колку е постар мажот, толку повеќе пати ќе се реплицираат неговите сперматогени матични клетки. Се проценува дека спермата произведена од 25-годишник ќе претрпи 350 репликации, додека спермата на 45-годишник ќе има 750. Секоја репликација создава повеќе можности за грешка. Што значи дека децата од постари татковци веројатно ќе имаат повеќе генетски мутации од оние родени од помлади татковци.

А бидејќи сега е можно да се види кој хромозом доаѓа од кој родител, познато е дека околу 80 проценти од овие мутации доаѓаат од таткото, било да е помлад било постар. Мажите произведуваат огромен број сперматозоиди – околу 2.000 со секое отчукување на срцето. Тоа се неколку милиони на ден.

Проблемите, сепак, се акумулираат како што човекот старее. Матичните клетки добиваат повеќе мутации. Изложеноста на загадувањето во животната средина предизвикува оксидативен стрес и оштетување. Овие работи, но и уште многу други, можат да влијаат врз бебињата од постарите татковци.

Автор: Драгана Шубаревиќ

Извор