Начинот на кој го започнуваме денот може да има големо влијание врз остатокот, а да не зборуваме колку многу значи кога ќе стекнеме некои здрави навики во детството.

Затоа експертите издвојуваат неколку добри утрински навики кои им помагаат на децата да бидат посреќни, поздрави, па дури и попаметни.

Будење во исто време, дури и за време на викендите

Доследноста е неверојатно важна во воспитувањето на децата. Рутината за будење помага да се „постави“ нивниот внатрешен часовник или циркадијален ритам. Благодарение на ова, детето ќе спие подобро навечер, полесно ќе се буди наутро и ќе биде во подобро расположение.

Децата што имаат постојан распоред за будење се концентрираат подобро на училиште. Студиите покажале дека тоа го намалува ризикот од чести промени во расположението, раздразливост, па дури и дебелина во детството.

Пиење вода веднаш по станувањето

Добро е да му дадете на вашето дете чаша вода веднаш штом ќе се разбудите наутро. По 8-10 часа без течности, колку што е и времето додека спијат, на телото му е потребна вода! Хидратацијата му помага на мозокот да работи подобро – ја подобрува меморијата, вниманието, па дури и расположението, го забрзува метаболизмот и го стимулира варењето на храната.

Здрав протеински појадок

Појадокот е навистина најважниот оброк во денот – особено за децата во раст и развој. Но, не е важно што им давате на најмалите да јадат наутро, важно е утринскиот оброк да биде богат со протеини. Протеините го одржуваат нивото на енергија стабилно, го поддржуваат растот на мускулите, функцијата на мозокот и имунолошкиот систем.

Две минути молчење

Една или две минути тишина наутро ќе им даде можност на децата да се поврзат со себе и да се подготват за денот што претстои. Овој краток „фокус на себе“ им помага да имаат подобра емоционална регулација и помалку вознемиреност, ги учи да забават и да не паничат за мали нешта.

Ограничено време пред екран

Разбираме дека понекогаш е полесно за родителите да го остават своето дете да гледа додека тие се подготвуваат за работа, но времето пред екран наутро може да им го отежни фокусирањето на малите подоцна. Екраните претерано го стимулираат мозокот, правејќи ги децата хиперактивни или нервозни кога е време за училишни задачи или други задачи.

Исто така, гледањето во екран наутро е поврзано со послаб распон на внимание и пониски академски перформанси.

Утринска листа на обврски

Дајте им на децата едноставна листа со обврски секое утро, а потоа дозволете им сами да проверат што направиле. Градењето рутини помага да се изгради самодоверба и независност кај децата и ги прави утрата помалку хаотични. Листата со обврски може да вклучува едноставни работи како миење заби, облекување, пакување на училишниот ранец.

Извор